AFC Asian Cup 2024: Tlawm chunga bul tan India

Qatar rama Asia khawmualpui huap ramte football-a inelna sangber AFC Asian Cup football tournament khelh tan takah Inrinni khan India chuan an match hmasaberah sihnih faiin Australia an hneh lo nghal.
2011 Asian Cup group match-ah bawk Australia lakah India hi sili fai ngawtin an lo tlawm tawh a, tuntum chu Australia an ngam loh dan a zia ta deuh!
Ram pahnih hi vawiriat intum tawhin, India vawithum an chak a, Australia hi vawili chakin, tum khat an inhnehtawk thung a; tarlan tak angin, Inrinni zan hma chiaha an intum hnuhnungber kum 2011 January ni 10-ah pawh chiang zetin Australia an chak.
Al Rayyan inkhelah khan Fifa ranking-a world number 25-na luahtu Australia kha world number 102-na India lakah khan kawng engkimah an chungnung zawk a tih theih a; first half chhungin Australia-in ball zaa 71 zet changin, shot vawi 14 an nei tling a, India chuan shot vawithum an nei ve hram a; mahse, khati khawpa an bet zawk chung pawha India tlarhnung hnathawh kha fak tlak ni vein a lang!
Kha Group B match-ah khan Australia kha chak zawk tura ngaihsa an ni ve hrim hrim a; Igor Stimac-a team khan firsh half chhungin an lama goal lut tur an dang tluan thei a, second half-ah erawh kum 2015 champion an dang zo ta ngang bik lo a; minute 50-ah Jackson Irvine chuan an goal hmasa zawk thawhin, minute 73-ah Jordan Bros chuan a khungbelh a, Ahmad bin Ali Stadium-ah rinkai zawk Australia an chak a, 2011 Asian Cup group match aiin kuminah India-in Australian-ho lakah goal an chhuah tlem zawk!
Tuntum India squad-ah hian Lallianzuala Chhangte leh Lalengmawia Ralte an tel a, an bultannaah Mizo star pahnih hian an ram tlawm tur an chhan zo lo phawt a; January ni 18 hian an group match hnihnaah Uzbekistan an su zui leh ang.
Group paruka a sang pahnih theuhte bakah pathumna team zinga a sang palite’n knock-out round of 16 an luh dawn avangin Australia laka goal hnih chauh chhuah India tan lungngaih viauna tur la awmin a lang lo a, chutih rualin Stimac-a team tan last 16 luh hrim hrim hi hlawhtlinna lian tak a tling ang.
Australia match an hmachhawn hma khan India head coach chuan an tumpui turte hrechiang chungin a naute chu tlarhnung ven lama insawrbing turin a hriattir lawk vek a, tharum leh thiamna hmanga an aia chungnung zawk sap ruakhau pui puite kha set-piece atanga goal zawnna hun remchang siamsak lo hram hram turin a chah bawk.
Second half-ah erawh a thuchah hi a hlawhtling ta lutuk lo a, Australian-te khan set piece an hmu mawlh mawlh a, a tam ber kha corner kick niin, mahse, an boss hlauhthawn ang em chuan thil a thleng ta lo a, Indian-te khan set piece atangin goal an chhuah lo.
A tir lam minute 45 chhung kha India player 11-te’n an lam goal bulah hun an hmang tam a, captain Sunil Chhetri meuh pawhin tlarhnung ven lam a buaipuina lamah an lam half a pel tam thei lo a, Australian-hi ‘attacking’ an dolet tlang a ni ber!
Indian attack-in a tihbuai loh Australia captain leh an goalkeeper ni bawk Mathew Ryan chuan centre line hnaih thuak atangin inkhel a en hi a ni hawt a! First half hun tam takah a team-mate-te ball a va inpekkualpui!
Hei hi an boruak tawn ni mah se minute 16-naah kha chuan India hian Australian palian barakhaih turin hun remchang an hmu ve nawlh a, Chhetri a chefuh tluanchhuak zo ta lo mai pawh a!
Kha thilah khan Nikhil Poojary chuan dinglam sirah tha takin hna a thawk a, mawi taka cross ball vawrhchhuakin, defender pathum ven kar atanga dawkchhuak Chhetri chuan Australian goal lamah ball thawn phei mah se goal sirah a thlawkchhuak ta hlauh a ni.
Mipui 45,000 len theihna stadium chhunga entu tam zawk kha Indian supporter niin, an captain thelh kha an ui hle tura ngaih a ni!
Australian goal zawng bawh chak leh hlauhawm em em kara fak hlawh chu Sandesh Jhingan kha niin, first half-a boruak ball an inchuhna lamah a lu tauhpawp mah se bandage-a lu tuam chungin India tlarhnung vengtu pawimawh a ni zui zel.
Minute 21-ah Connor Metcalfe chuan sap team hmahruaina goal khung turin golden chance nei mah se box pawn atanga a chhuih chu engtin tin emaw Indian goalkeeper Gurpreet Singh Sandhu chuan a lo khaksawn hman hlauh a, backpass dawnsawn chungchangah Sandhu hi a chechhe teuh hle bawk.
Tarlan tak angin, second half erawh a dan a dang ta a, Irvine chuan goal hmahruai khungin, a hnuah substitute Riley McGree chuan Lalengmawia hnehin Australia goal hnihna khungtu Bros tan ball a vawrh a, sihnih faiin Australia an chak theih phah.