Afcon 2023 draw a chhuak
Africa khawmualpui ramte mipa football-a inelna lian ber 2023 Africa Cup of Nations chu a hun sawnhlat niin, nakkuma khelh tura ruahman a ni a; Ivory Coast rama khelh tur Afcon 2023 draw tarchhuah takah hian champion lai Senegal leh champion tura beiseiawm dang Cameroon chu group khatah an awm.
2021 Africa Cup of Nations final-ah khan Senegal football team hian penalty shootout-ah Egypt hnehin a vawikhatna atan he tournament title hi an sualchhuak a, Afcon 2023-a an trophy kawl lai humhim an tumna tur kawngah team khawng Cameroon chu group stage-ah an hmachhawn a ngai dawn a ni.
Karliamtaa Abidjan khawpuia Afcon 2023 draw inkhawmah hian Africa khawmualpuia star rual an fuankhawm a; he hudefending champion Senegal chu Group C-ah an thenawm ram pahnih Gambia leh Guinea-te nen an awmho bawk.
Liverpool forward hlui leh Senegal kulhpui Sadio Mane chu tem draw chhim tura chhuakkhawm African football legend zingah hmuh tur awmin, an group chu a hautak dawn hle tih a sawi a, chutih rualin Cameroon chu tum hautak hle dawn mah se first round paltlang turin an theihna sang ber an hlan dawn tih a sawi.
World Cup semi-finalists leh 2025 hosts ni bawk Morocco chu nakkum tournament khel tur African team zinga Fifa ranking-a sang ber niin 13-na luahtu Atlas Lions hi DR Congo, Zambia leh Tanzania-te nen group khatah an awmtlang.
2021 Afcon Team of the Tournament-a tel Morocco star player Achraf Hakimi pawh kha group draw-ah hian a inlan ve bawk a, amah bawrtu medi mite hmaah World Cup-a an thlensan ang bawk khan Afcon lamah pawh thui tak thleng leh turin an theihna zawng zawng nen an bei leh dawn tih a sawi a, team tha tak an la nih reng thu leh an awmna group a fuh thu a tarlang tel.
Draw laia legend inlan zingah African Footballer of the Year atana tum hnih thlan tawh, Chelsea leh Ivory Coast striker hlui Didier Drogba bakah 2013 Afcon-a Nigeria champion-puitu, Jon Mikel Obi pawh hmuh tur a awm.
Nakkum tournament lian thlengtu tur Ivory Coast hi kum 1992 leh 2015 khan champino tawhin, kumthar January ni 13 khian a tum thumna’na trophy hawn leh an tumna kawngah Guinea-Bissau an su hmasaber ang a, an group-a an tum tur dang pakhat chu Equatorial Guinea an ni.
Draw pumpui thlirkual thuak thuak ila, ram inthenawm South Africa leh Nambia chu Tunisia leh Mali-te nen Group E lamah awmhoin, he tournament-a group ineltawk tak tur an nih a rinawm.
Kum 2010 hnu lama final round-a inlan pha lo ta vang vang Mozambique chu tuntum draw-a tel zinga inlan lo rei ber niin, an kirlehna tournament-ah hian Group B lamah Mohamed Salah lansarhna Egypt telin, Pharoahs hian tournament hnuhnungber 2021 final-ah khan penalty petah Senegal an hneh lo tih tarlan a ni tawh thin a, kum tharah hian an title pariatna tur an beisei tha leh dawn a; an group-a tel ve dangte chu Ghana leh Cape Verde an ni.
2023 Africa Cup of Nations hi a tir takah chuan kumin June leh July thla chhunga khelh tura ruahman niin, hetih hun lai hi ruahtui tlak tam lai a nih avangin nakkum atan an sawnhla ta a ni.
Ivorian capital Abidjan-a stadium pahnih leh Bouake khaw khelmual bakah Korhogo, San Pedro leh Yamoussoukro khuaa he tourna-ment atana stadium an saktharah match-te hi khelh a ni ang.
Team 24 inelna tur nakkum Nations Cup hi January ni 13 atanga khel tanin, February ni 11-a zawh fel tura ruahman a ni a; group paruka a sang ber leh a dawttute theuh bakah pathumna team zinga a sang palite’n knockout phase an lut ang.
Kum 2024-a khelh tur ni mah se official-a tournament hmingah ‘2023’ dah zui zel a ni dawn a, chuvanga 2023 Africa Cup of Nations ti an ni.
Kum 2024 February ni 11-a final match khelhna hmn atan Abidjan khawpuia Alassane Ouattara Stadium thlan a ni.
Africa Cup of Nations 2023 draw:
Group A : Ivory Coast, Nigeria, Equatorial Guinea,
Guinea-Bissau.
Group B : Egypt, Ghana, Cape Verde, Mozambique.
Group C : Senegal, Cameroon, Guinea, The Gambia.
Group D : Algeria, Burkina Faso, Mauritania, Angola.
Group E : Tunisia, Mali, South Africa, Namibia.
Group F : Morocco, DR Congo, Zambia, Tanzania.