Afcon 2025 draw:
Champ lai Ivory Coast vs Cameroon
2023 Africa Cup of Nations champion Ivory Coast chuan defending champion ni chungin Morocco ramin a thlen tur 2025 Africa Cup of Nations (Afcon) an khel dawn a, group stage-ah Cameroon nen an awm dun.
2023 Afcon final-ah khan Ivorian-ho hian a thlengtu ni chungin final-ah 2-1-in Nigeria an hneh a; tunhnai Rabat khawpuia Afcon 2025 draw-ah Elephants hi Group F-ah Pierre-Emerick Aubameyang hoa inlan leh tur Gabon leh Mozambique-te nen an awmho bawk.
Africa khawmualpui infiamna huanga an kutpui lian ber hi kumin December ni 21 atanga tanin, kum 2026 January ni 18-a zawh fel tura ruahman a ni.
Opening match-ah tournament thlengtu Morocco leh Comoros an innuai ang.
Afcon hnuhnungbera champion zo ta lo Nigeria chu Group C-ah Tunisia, Uganda leh Tanzania-te nen awm hoin, Uganda leh Tanzania-te hi 2027 Africa Cup of Nations inthlentawm tur ram an ni.
Africa khawmualpui ramte football-a inelna lianberah hian Africa chhim lam team pathum South Africa, Angola leh Zimbabwe-te chu Mohamed Salah lansarhna Egypt-te nen Group B-a khungkhawm an ni.
Civil war avangin buai hle mah se Afcon 2025 khel tura an tlin ve miau avangin Sudan chu Group E-ah Algeria, Burkina Faso leh Equatorial Guinea-te nen awmho tura pawh an ni.
Moroccan legend Mustapha Hadji wchu he draw-a team intum tur pawttu zingah telin, Nottingham Forest leh Tottenham defender hlui, Ivory Coast tana Afcon trophy vawihnih chawi tawh Serge Aurier tel bawkin, Nigeria-in kum 2013-a Afcon an lak tuma an captain Joseph Yobo leh kum 2021 tournament-a coach ni chunga Senegal champion-puitu Aliou Cisse kan hmu tel.
Teranga Lions boss ngaihsan hlawh ni thin hian an ram tum tur a pawt a, Group D lamah DR Congo a pawt fuh.
Team 24-te hi group paruka thendarh niin, group tina a sang ber leh a dawttu theuhte bakah pathumna team zinga a sang zual palite’n knockout stage an lut ang.
Women’s Africa Cup of Nations (Wafcon) thlengtu tur ni bawk Morocco hma hian Guinea chu Afcon 2025 hosts tura tinzawnni hman mah se infrastructure leh facilities tehna zawna an teh tlin loh avangin Morocco an penchhuak ta zawk a ni.
Thawhtanni daih tawha Afcon 2025 an tan hma darkar tlemte chauh awm tawhah khan tualchhung lama an organising committee chuan Afcon 2025 match khelhna tur khawpui hming paruk puangin, chu;ngte chu – Rabat, Casablanca, Agadir, Marrakech, Fes leh Tangier an ni a, he’ng khawpuia stadium pakuaah match-te hi khelh a ni ang.
Chu’ng zinga stadium palite chu an ram khawpui ber Rabat awm niin, final match khelhna tur Complexe Sportif Prince Moulay Abdellah pawh Rabat khaw stadium pali zinga pakhat a ni.
Morocco hi 2030 World Cup thlengtu tur pakhat (co-hosts) ni bawkin, Spain leh Portugal-te nen he Fifa tournament lianber hi an inthlentawmho dawn a; chu mi huna final match chan inbeisei chungin kum 2027-a zawh fel hman tur Casablanca khawpui daifemah seat 115,000 tehreng awmna stadium ropui an ruahman mup mup mek a ni!
Afcon 2025 group draw
Group A:
Morocco, Mali, Zambia, Comoros
Group B:
Egypt, South Africa, Angola, Zimbabwe
Group C:
Nigeria, Tunisia, Uganda, Tanzania
Group D:
Senegal, DR Congo, Benin, Botswana
Group E:
Algeria, Burkina Faso, Equatorial Guinea, Sudan
Group F:
Ivory Coast, Cameroon, Gabon, Mozambique