Bangladesh chuan Afghanistan kawng a zawh hlauhna a neih thu sawiin writer-activist Taslima Nasrin chuan Islamic radicals te chuan thalai rual te chu an thluak su in ‘anti-India, anti-Hindu leh pro-Pakistan’ hawiin an kaihruai mek tiin a sawi.
Nasrin chuan a tirah chan Bangladesh ‘autocratic sorkar’ laka students’ movement chu a thlawp hman tiin a sawi a.
Mahse, tun hnaia Hindu te laka hleilenna hrang hrang awm leh journalist te bithlur leh lung in atanga ‘firfiakte’ chhuah zalen an nih hnuah students’ movement ni lovin ‘islamist jihadist te plan leh fund vek a ni tih’ a man tiin a sawi.
“July thlaa zirlai tena quota system duh lo va lungawilohna an lantir lai khan kan thlawp a, women’s rights, human rights leh freedom of express duh tu ten kan thlawp a ni” a ti a.
“Sheikh Hasina kha autocrat niin fundamentalist te chawm nung leh freedom of express khuahkhirhtu a ni a. A lakah mipuite an thinrim a ni” tiin Nasrin chuan a sawi bawk a.
Sorkar thar a pian theih nan inthlanna felfai leh thianghlim democratic taka huaihawt an beisei tiin a sawi bawk a.
“Mahse a hnuah students’ movement a ni lo tih kan man fiah ta a ni. Islamist jihadist te dan pawna hnawlte ruahman leh fund vek a ni tih kan man fiah ta a ni” tiin Nasrin, a lehkhabu ziah avanga Islamic fundamentalists tena thaha an vau avanga kum 1994 atanga Bangladesh chhuahsan tawhtu chuan a sawi bawk.
“Thil engkim tichhia a, statues, sculptures, museum te an tihchhiat vek hnuah leh Hindu te beia an tihhlum hnuah kan hrethiam ta chauh a ni” a ti bawk a.
“Heng mite hian Hasina hnaih journalist te lakah thubuai an ziaklut bawk a. Muang changin an hmel leh thiltum dik tak an pholang zui ta zel a ni. Firfiak te, lung in a khung mek te chu chhuah zalen in an awm tawh a. Zirlai movement a ni lo reng reng” tiin Nasrin chuan a sawi bawk.
‘Lajja’ author hi Bangladesh a chhuahsan atangin a la haw leh lo va, kum 2005 atang khan India ramah a cheng zui ta char char a ni.
Nasrin chuan Bangladesh chu Afghanistan emaw Iran ram angin a chhuak mai ang tih hlauhna a neih thu sawiin interim sorkar chu Chief Adviser Muhammad Yunis kaihhruaina hnuaiah hna an thawk mek a ti bawk a.
“Yunus hian mipuite hnehna an lawm mek tiin a sawi a. Heng mipuite hian Hindu te chenna an hal a ni. Eng lawmna nge ni ngai? Engkim an ti chhe vek a. Freedom fighter te lim an tichhia a, chung zingah chan father of the nation Sheikh Mujibur Rahman lim pawh a tel.
“Mahse, Pakistan Army statues te indo laia mi maktaduai 30 chuang thata hmeichhiate pawngsualtute lim te chu khawihin a awm ve lo thung” tiin kum 62 a upa writer lar tak, radical Islamic elements te sawisel thintu chuan a sawi bawk.
Nasrin chuan Yunus chuan chiang takin Bangladesh chu jihadist ten an thunun dawn tih a hriaa chu chu a pawi ti lo a ti bawk a.
“Inthlan a huaihawt kan beisei laiin a tum reng reng lo. Secularism chungchang an sawi lo va, Bangladesh chu Afghanistan emaw Iran anga siam tumin chu chu hlauhthawnawm tak a ni” a ti bawk.
Yunus chuan Hindu te beihna tawh chu tihtawp a tum thu a sawi laiin Nareen chuan tharumthawhna titawp turin a takah chetlakna a nei lo a ti bawk a. “Bangladesh hi Afghanistan a nih loh hram kan beisei a ni” tiin a sawi bawk.
Nasrin chuan Hasina pawh tuna Bangladesh dinhmun siamtu tia sawiin a dem thu sawiin Islamic radical te pawng chho chu tun hnaia thleng thut a ni lo a ti bawk a.
“Hasina ka demna chu sakhuana chu thuneihna chatuana chantir a thlan vang a ni. Model mosque 560 chuang a din a, Islamists te tihlawm nan secular school aiah madrasas a din a ni.
“Madrasa degree te chu university degree nena intluktlanga siamin education system a tichhia a, Wuran leh Hadis zirte chauhin university rapa teacher nih theihna a siam a ni” a ti bawk a.
“Hmeichhiate chu hijab leh burkas ha ngei ngei tura tuklui bawkin, heng te hi Hasina siam vek a ni” tiin a sawi bawk.
Bangladesh ah anti-India boruak a lian mek tiin a sawi bawk a. “Kum 1994 khan Khalida Zia chuan Bangladesh atangin min um chhuak a, Hasina in thuneihna a chan hnuah pawh ram chhung ka luh a remti chuang lo.
“Kum 1998 khan Bangladesh chu ka nu cancer thi lek lek tawh hmu turin ka lut a. A hnu reiloteah ka nu a thi a, Hasina in min umchhuak zui leh nghal a, ka luh leh a remti ngai lo zui a ni” a ti bawk a.
“Hasina khan min sawisak avangin ka kalh a ni chuang lo, autocrat a ni a, freedom of speech tei thei lo a ni bawk. A rorel laiin jihadist ten thinker tam tak an tihlum a. Islamic radicals te pawng mek hi thil thleng thut a ni lo. Hasina hunlai khan hun dang zawng aiin Hindu ten beih an tawk nasa zawk” tiin Nasreen chuan a sawi bawk.
Bangladesh thalai te chu India leh Hindu te haw tura an thluak suk an ni a ti bawk a. “hindu ten Bangladesh an chhuahsan mek tawh a, population atanga seven percent vel chauh an ni a. Islamic radical te chuan election lai, puja lai pawhin Hindu te beiin an property te an chhuhsak thin. Hasina sorkar khan anti-women leh anti-Hindu kaihhnawih telna religious sermon thlak chu khawiah pawh a remti vek a ni” a ti bawk a.
“|halaite thluak i suk tawh chuan generation khat tawp Hindu leh India leh hmeichhia kalh awmin pro-Pakistan, pro-jihadist, pro fanatics i siam tihna a ni” tiin a sawi bawk.
Nasrin chuan tun sorkar hnuaiah chuan Bangladesh a let ngaihna awma a hriatloh thu sawiin India pawhin an rama a chen remtihna chu a renew rih lo a ti bawk a. “Kan ramah ka let thei dawn lo. Khalida emaw Hasina emaw in an remti ngai lo va, tuna jihadist rorelnaah phei chuan luh ngaihna a awm lo” a ti bawk.
“India hi ka home ang mai a ni tawh a, kum 2005 atangin ka awm tawh a. Mak tak maiin ka resident permit pawhsei a ni lova a chhan hrilh ka ni hek lo. July 27 khan a tawp tawh a, sorkar emaw in hriattirna pawh min pe lo, a hma chuan a tawp hmaa tihnun leh zel thin a ni” tiin a sawi bawk.
“Ka chhungte thenkhat Bangladesh ah an la awm a, a tam zawk te ka hmangaih em em te chu an thi tawh thung a. Ka pi, ka pa, ka patea te leh ni te an thi tawh a ni. Ka ram lut turin dikna ka nei a, he zawhna hi mitin te hnenah ka zawt a, vanduaithlak takin chhanna ka dawng ngai lo” tiin a sawi bawk.
Afghanistan angah Bangladesh chhuah hlau
