Afghanistan-a Taliban-te chuan Pakistan ram chhungah beihpui an thlak tih an sawi a, Islamabad chuan an sipaiten khawthlang lama ram leilung hausa tak, Balochistan-ah drone pali an kap thla niin an sawi ve bawk.
Thawhlehnia thil inthleng hi Asia chhim lama inthenawm ramte inkara buaina chhuak thar ber a ni.
Afghan defence ministry chuan an sipaiten Pakistan nena an inrina province, Balochistan-a Saranan khawpuiah ISIS center nia an sawi chu an kap tih a sawi a, hei bakah hian Khyber Pakhtunkhwa province hmun dangah pawh an bei tih an sawi.
Thuchhuah siamin Pakistani sipaite chuan drone-te hi hmu a, kah thlak a nih thu an sawi a. Province thuneitute pawhin drone-a beih a nih thu an sawi a, Saranan-a sorkar sikul bulah hmuh a nih thu an sawi a, mi pahnihin hliam an tuar niin an sawi.
Afghanistan-ah hian fighter jet nei lo mah se thlawhna dang paruk leh helicopter 23 vel a nei nia hriat a ni tih London-a International Institute for Strategic Studies chuan a sawi a. Taliban sipaite hian Pakistan nena an inbeihnaa an lo hman tawh drone an nei tih hriat a ni bawk.
Pakistan chuan Afghanistan hi an rama beihpui thlak tumtu nia a puh firfiakte kawltu niin a puh a. Afghan Taliban chuan an hnial a, an ram chhung buaina a nih thu an sawi.
Thawhtanni khan Pakistan-in Afghanistan nena an ramri thlawhna hmanga a beihnaah civil mi 28 an thi a, 49 an hliam a, hei hi Islamabad chuan an ram leilung chunga ‘firfiakte beihna’ phuba lakna a nih thu a sawi.
Tun hmaa tang dun thin ramte inkara buaina chhuak avang hian kuminahi mi za tam takin an thi tawh a, China-in dawr ve ve mah se rah tha a la chhuah thei lo
Afghanistan-in Pakistan an kap
