Afghanistan lirnghing avanga nunna chan mi 1,000 an chuang tawh a, chhanchuaktute chuan theihtawpin chhanchhuah hna an thawk mek a.
Lirnghing na tak 6.3 magnitude chuan kar kalta Inrinni khan Herat province nuaiin villagers te chuan suahdur leh kut lawng te hmangin chin hriatloh mi 500 chuang te chu zawn hna an la thawk mek tiin UN chuan a sawi.
Lirnghinna hmun pawhna kawngpui te chu danchaha awmin communication line te a chhiat bawk si avangin tanpuina pawh pek theihin a awm lo bawk a.
Lirnghing hian Heart city atang 40km vela hla awm Zindajan chu a nuai na hle a, he khuaa chenna in zawng zawng a tichhe vek tiin UN Office for the Coordination of Humanitarian Affairs (OCHA) chuan a tarlang.
Talban sorkar leh aid agencies te chuan a tirah chuan nunna chan zat pawh an hriat theih loh thu an sawi a, tunah pawh chin hriat loha awm tam tak an la awm mek bawk a. Officials te chuan heng hmun te hi a kilkhawr em avangin population record pawh an nei tha lo tia sawi a ni bawk.
Heng lai hmun hi indona leh khawkhengin a nuai fo niin hei vang hian local administration lam pawhin mi engzah chiah nge cheng tih pawh a hrefiah lo an ti bawk.
Damdawi In te pawh hliam te enkawl vek thei tur khawpa lian leh tha a ni lo va, hei vang hian hliam tuar tam tak te chu Herat Regional Hospital pantir niin helai hmunah hian medical charity Medecins Sans Frontieres (MSF) te chu an inbun thung a ni.
“Dam lo tam tak lokal te hi non-emergency case an ni hlawm” tiin Prue Coakley, MSF Afghanistan chuan a sawi a. “Mahse, hliam tuar tam ber te chuan hawna tur an nei tawh lo a ni. Hei vang hian tam tak te chu kalna tur an neih loh avangin damdawi In leh a velah an chambang ringawt” tiin a sawi bawk.
Prue Coakley chuan a team te chuan a bik takin paediatric patients te thlurbing tur chu Herat-ah tirhluhin an awm tiin a sawi bawk a. UN chuan lirnghing tuar damchhuak an enkawl tam ber te chu hmeichhia leh naupangte an ni a ti a, nunna chân zingah pawh naupang leh hmeichhiate an tam thu a sawi bawk.
Taliban sorkar chuan lirnghing tuar damchhuak te chuan ei tur, tui thianghlim, damdawi, thuamhnaw leh tawmhulna tur an mamawh tiin a sawi a. Aid agencies tam tak te chuan tanpuina pe tawhin chung zingah chuan Afghan Red Cross Society, MSF, World Food Programme leh Unicef te pawh an tel a. Mahse, agencies te chuan sum nei lo Afghanistan ram chuan tanpuina tam zawk a mamawh tiin an sawi.
Afghanistan hian kum 2021 a Taliban tena thuneihna an chan leh hnuah economic crisis turu tak a hmachhawn mek a. Taliban tena rorelna an chan loh lai chuan khawvel ram hrang hrang tena an puihrawn a ni.
Tuna lirnghing a tawh hnuah pawh ram tlemte chauhin an puih tur thu an sawi a. China Red Cross Society chuan $200,000 a pek tur thu a sawi niin Chinese media te chuan an sawi a.
A thenawm Pakistan chuan Afghan officials te nena inbiakna neiin theihtawpa tanpuina awm thei te an pek tur thu an sawi bawk.
Afghanistan hi lirnghingin a nuai fo niin a bik takin Hindu Kush mountain range chu Eurasian leh Indian tectonic plate inrina laia awm a nih avangin a nasa zual a ni.
Nikum June thla khan Paktika province chu 5.9 magnitude laia na lirnghingin a nuai tawh bawk a, mi 1,000 chuangin nunna chanin mi sang tam fe chenna nei lovin a siam bawk a. Nikum June thlaa lirnghing natak a tawrh avang khan a nghinna hmuna tuartute chuan an la tuar hle reng a ni.
Afghanistan lirnghing vanga nunna chan 1,000 chuang tawh
