Afghanistan lirnghingah mi pariat thi

Afghanistan lirnghingah mi pariat thi
Afghanistan-a lirnghing vanga Kabul-a in chimah mi pariat an thi a, naupang pakhatin hliam a tuar niin National Disaster Management Authority chuan a sawi.
Hindu Kush biala Zirtawpnia lirnghing hi magnitude 5.9-a na niin German Research Center for Geosciences (GFZ) chuan a sawi.
Lirnghing hi lei hnuai km 177-a thuk atanga intan a ni tih GFZ chuan a sawi bawk.
Lirnghing hian Afghanistan-a Kabul leh a chhehvel bakah Pakistan khawpui Islamabad leh India khawpui, New Delhi pawh a sawi phak niin a hmuna awmte chuan Reuters an hrilh a. Hetih lai hian ram pawn lamah hi chuan chhiatna a thlen sawi leh hriat a awm lo hlauh thung.
Tlangram khawkrawk tak tak hmun tamna, Afghanistan hi khuarel chhiatna an tuar nasa a, niin chhiatna lian tak tak a lo thleng fo tawh thin a. Lirnghing bik hi khuarel chhiatna zinga thihpui an tam ber thin a ni a, kum tin mi 560 velin an thihpui ziah ang a ni.
An in sak danin a zir lo va, hlim leh thinga sak a la tam avangin hengte hi lir nghingin a sawi chim duh em em a, hei hi thi an tam chhan lian tak a ni bawk.
Afghanistan awmna lai hi khawvel leilung innghahna (tectonic plate) pahnih, Asia leh Europe khawmualpui insutna lai niin lirnghin thlen duhna ram a ni hrim hrim bawk.
November thlaa lirnghing na tak, magnitude 6.3-a na thlengah pawh khan mi ⁠27 vel an thi nia hriat a ni a, hliam tuar tam tak nen in za tel chhe bawk a ni.