World Bank president David Malpass chuan China in Africa ram thanglai meka loan a pek te chu ngaihtuahawm tia sawiin ‘langtlang zawka’ kalpui a ngai tiin a sawi a.
Hetihlai hian Ghana leh Zambia ram te ang chuan Beijing hnena an leiba rulh lmaah harsatna namenlo an tawk mek nia sawi niin China thung chuan a loan puk tirah international rules a zawm a ti ve thung.
Ram thanglai tena ram dang emaw multilateral body te hnen atanga infrastructure, education leh agriculture tihhmasawn nana sum an puk hi thil kalphung pangngai a ni reng a.
Mahse nikum khan US leh economy lian ram tena interest rate an tihsan avangin loan rulh lamah harsatna nasa zawk thlengin a chhan ber pawh loan lak te chu foreign currency US dollar emaw euros hmanga rulh thin a nih avangin loan rulh man a to zual a ni.
Chutak chu ram thanglai mek sum lama harsatna tawk te tan chuan loian rulhna tura sum hmuhbelh chu thil awlai litak niin interest rate san avangin an sum hlutna a tlakhniam ve zel bawk si vang a ni.
Heng te avang hian economic growth chu a muan phah lo thei dawn lo tiin David Malpass chuan a sawi a.
Heng loan lak leh a sawhkhawka harstana awm thei te sutkian a nih theih nan hian US vice president Kamala Harris chuan African ram pathum a fang mek a, Tanzania leh Ghana te chu sum lama puih a tiam zui bawk a.
Africa-ah hian China thiltitheihna a nasa zualzela ngaih niin Africa a natural resources heng metal, nickel ang te chu electric car battery atana mamawhna a san avangin China hi a inrawlh thuk phah tia sawi a ni.
Ghana capital Accra a thusawina a neihah, “America chuan kan African partner te tana eng nge kan tihsak theih ang tiin min kaihruai dawn lo, kan African partner te nen eng nge kan tihho theih ang tih zawk a ni” tiin Harris chuana sawi a.
Tanzania ah pawh Harris chuan nickel processing facility tawlhin US leh market dang te chu chawm tur a nih thu sawiin chu chuan ‘climate crisis a harsatna sutkian nan thawkin, global supply chain mummal siamin industry thar leh hnathar a siam dawn a ni’ tiin a sawi bawk.
US leh Africa ram te hmalakna chu fakin Malpass chuan khawvela economy lian ber pahnih US leh China te inelna chu ram thanglai mek te tana tha a ni thei a ti a.
“Awm se la ka duh ber chu contract langtlang taka siam a ni a, chu chu kan harsatna ber pakhat a ni tlat thugn a. Contract ziahin midang tumah hmuh tur a ni lo kan ti a nih chuan thil fello a awm tihna a ni a, chutiang lakah chuan kan inthiarfihlim a ngai a ni” tiin a sawi.
Hei mai bakah hian Africa ram sorkar te chu fimkhur tura tiin dahkham siamin loan la lo se a duhthu a sawi a, a chhan chu chhuanthar tam tak te harsatna thlen thei a ni a, chu tak chu China nena loan laka thil thleng mek a ni tiin a sawi bawk.
Africa a China loan-ah ngaihthatlohna nei
