African players of the year atan
Lookman leh Banda an thlang
Morocco khaw thlanglama an khawpui lian pakhat Marrakesh-a Confederation of African Football (Caf) Awards sem inkhawmah Europa League final-a hat-trick siamtu Atalanta forward Ademola Lookman chu 2024 African Footballer of the Year atan thlan niin, hmeichhe lamah Orlando Pride striker Barbra Banda thlan a ni bawk.
Nigeria international Lookman hian he ward thlannaa a elpui lian pathum – Ivory Coast player Simon Adingra, Guinea star Serhou Guirassy, Achraf Hakimi of Morocco leh South African Ronwen Williams-te a hmakhalh.
Nikum khan he award hi Nigerian ve bawk Victor Osimhen chuan dawngin, kuminah pawh Negeria bawkin African football-a chawimawina hlu bik hi an hawn zui leh ta a ni.
2023-24 season hmang fuh kum 27 mi Lookman hi award dawng thei tura rinkai a ni ve reng reng a; Italian club-in a vawikhatna atana European trophy an lakna kawngah a thawhhlawk a, final-a Bayer Leverkusen an hnehna game-ah goal thum khungin, kum 1975 hnu lamah European club final-a hat-trick siam thei parukna a ni.
International lamah pawh a chetha a, Ivory Coast rama Africa Cup of Nations-ah khan team of the tournament-ah telin, kumin February thla tournament-ah Super Eagles champion-pui zo ta lo mah se a thlengtu ngam loa runners-up an nih theihna kawngah goal thum a thawh.
Everton, Fulham leh Leicester City player hlui Lookman hi men’s Ballon d’Or shortlist-a African hming lang awmchhun ni bawkin, 14-na a ni.
Lookman hi tun season kal mekah pawh Atalanta tana player thawhhlawk ni leh mekin, a team-in Serie A table-a hma an hruai theihna kawngah goal riat a thun tling tawh.
Hmeichhe lama 2024 African Footballer of the Year Barbra Banda ve thung kha Zambian zinga women’s prize dawng thei hmasaber niin, a elpui lian Moroccan Sanaa Mssoudy leh Nigerian Chiamaka Nnadozie-te a hmakhalh.
United States’ National Women’s Soccer League (NWSL) Championship final-a Orlando Pride chakpuitu Banda hian November thla NWSL Championship final-a sikhat faia Washington Spiritt an hnehna goal awmchhun thunin, thla khat liam hma deuh khan BBC Women’s Footballer of the Year atana thlan a lo ni tawh bawk.
Orlando Pride kuta title hmasaber luhpuitu kum 24 mi hi United States’ National Women’s Soccer League Most Valuable Player (MVP) a ni tel bawk a, tunah Africa khawmualpuia hmeichhe footballer tha berah an thlang zui leh ta a ni.
Caf Awards thlangtu panel of experts member-te hi Caf technical committee member-te bakah African media professionals, player leh coach-te an ni.
African players of the year atan Lookman leh Banda an thlang
