African ramten tuialhtheiah indo an tuar nasa

African ramten tuialhtheiah indo an tuar nasa
US leh Israel tangdunin Iran an beih avanga tuialhtheia harsatna awm chu Africa ram hrang hrangten an tuar mek.
South Sudan chuan an khawpui, Juba-ah electric a sem rual tan a, Mauritius chuan power hman tamna hmuna electric hman ral tlem nan khuahkhirhna a siam ve bawk.
Nilaini khan Juba-a electric sem darhtu lian ber, Jedco chuan khawpui chhung hmun thenkhatah ni tin inên chhawk kalpui tan a ni dawn tih a puang.
“Iran leh US inkara buaina chhuak mek avang hian… Jedco hian a energy khawl sa chu ren taka a enkawl a ngai a… a rualkhaia sem kan dah pawimawh ber a ni,” an ti.
Thliarkar ram, Mauritius chu electric siam nana tuialhthei a lak luha innghat nasa a ni a, a tlakchham avangin emergency a awm mek nia sawi a ni.
Sorkar chuan kar tawp lama thleng tur a thleng thei lo va, ni 21 daih chauh tuialhthei an kawl tawh rih tih a puang.
Energy Minister Patrick Assirvaden-a chuan Thawhtanni khan sorkarin Singapore atangin a lei a, April 1-a thleng tur leh thla khat hnua tam zawk thleng tur an hmuh thu a sawi a, a man a to zawk dawn thung.
South Sudan hian Africa khawchhak lam tuialhthei tamna hmun lian ber ber a nei a; mahse, a tam zawk hi an ram pawna thawn chhuah a ni a, tuialhthei thlitfim sa chu ram pawn atangin an la lut thung a. International Energy Agency chhinchhiah danin South Sudan hian electric 96% chu tuialhthei ringa siam a ni.
Sorkarin tuialhthei lak luhna dang an hmuh tam tawk loh avangin Zimbabwe-ah chuan petrol-a ethanol an telh zat chu 5% atangin 20%-ah an tipung dawn.
Tuialhthei man tihhniam nan an lakluh atanga chhiah thenkhat tihtawp a tum thu an puang bawk a, thla khat pawh tling lo chhungin thenkhatah chuan 40% zetin a sang tawh a ni.
An khawpui, Harare-a street vendor pakhat chuan Iran indona a chhuah aṭang khan engkim man a sang chho hle niin a sawi.
Ethiopia-ah chuan thuneituten fuel supply company-te chu venhim hna thawhna, sorkar project lian, industry pawimawh leh ni tin mamawh siam chhuahna hmun ngai pawimawh hmasa turin an ti.
Ethiopian Oil & Energy Authority-in kar hmasa lama hmalakna a puan danah petrol station-te chuan vantlang lirthei an dah pawimawh ber a, a ren nan khuahkhuahna an siam bawk.
Tual chhung indona hmuna a chan leh mai hlauhawm, Tigray region-a thuneitute chuan tuialhthei pek chhuah tihtawp vek an nih thu an puang.
Kenya-ah chuan petrol station 20% chuan an tlachham tawh nia sawi a ni a. Hei hi petroleum outlet aiawhtu association chuan miin chiaia an lei nasat vang niin an sawi.
Hetih lai hian energy ministry chuan Nilaini khan tuialhthei indaih lohna a awm tih chu a dik loh thu a sawi a, retailer-te chu thil man to zawk beiseiin an khawl niin a puh a. Opiyo Wandayi-i hian mipuite chu chiai taka lei lo turin a ngen bawk.
An thenawm, Uganda chuan tuialhthei a tlachham nia sawi a awm mek laiin sorkar chuan mamawh tawk a awm theih nan hma a la mek tih a sawi a. Sorkar hian distributor-te chu a man tisang lo turin a ti.
South Africa-a thuneitute chuan an mamawh tawk an hmu tih an sawi a, hun rei tak buaina a awm chuan thla lehah chuan lak luh leh a man a nghawng thei dawn niin an sawi.
Africa chhim leh khawchhaka lawng chawlh hmun leh phurtuten Red Sea leh Strait of Hormuz pumpelha Cape of Good Hope chhehvela an kal chuan harsatna an tawk lo thei.