African Union ten G-20 zawm thei dawn

African Union (AU) te chuan negotiator tena remtihna an pek hnuah G-20 an zawm thei dawn ta a. Delhi khaw pawna Sherpa meeting neihnaah tihfel ngai tihfel zawh tawh nia sawi a ni.
Member ram 55 awmna AU chuan European Union zuiin G-20 ah regional body pahnihna an ni dawn a. Hei vang hian G-20 chu “G-21” tia thlak a nih phah dawn em tih erawh a la chiang lo thung a. Indian officials te chuan AU in G-20 an zawm thei tur chu Indian presidency hmalaknaa Global South thiltum tihhlawhtlin tumna kal zel tiin an sawi ve thung.
Ningani khan sawihona neih niin Sherpas tih hi G-20 leader theuhte aiawh te sawina niin sawihona la chhunzawm zel tur niin engkim peihfel hnuah draft declaration siam chauh tur a ni.
G-20 summit neih tawh tinah joint statement la siam vek a ni a. Kuminah pawh Pathianni tlai lama a tawp rualin Indian officials te chuan joint statement a khar theih a nih an beisei hle a ni.
Mahse, hmalakna kal mek chu ‘geopolitical issue’ paragraph in a tibuai hle tia sawi ni thungin pakhat zawk chu nikuma Bali G-20 a paragraph pahnih pawm tawh te chungchangah niin Russia leh China chuan Indian draft chu an pawm lo a ni. Inhnialna siamtu ber chu tuna draft siam meka ‘Paragaph 6′ chu niin chu chu United Nations General Assembly (UNGA) resoltuion siama RUssia in Ukraine a demna chungchang ziah lanna chu a ni.
Sherpas te chuan hun rei tak draft declaration siam a nih theih nan hian an buaipui tawh a. Ningani pawh khan zinglam dar 3 thlengin draft chu la buaipui nia sawi a ni a. Tam tak chinfel anih tawhrualin a bik takin climate financing leh debt restructuring lama tawngkam hman dan turah ngaihdan a la inang thei lo tih a ni bawk a.
Hei bakah hian ram thang mek te chuan carbon emission tihtlema fossil fuel hman tlem zel tumnaa hun bituk siam chu sawn hlat an ngiat bawk a. A bik takin China palaite chuan India-in a hmalakna leh tawngkam a hman tam ber te chu a sawisel a. Meeting neihna chu Indian leh Chinese palai te inhnialna a ni ber tihiala sawi a ni.
AU member chungchangah erawh inrem tlanna awm thungin Russian leh Chinese officials te pawhin an pawm ve ve a, mahse, AU member nih theih chhanah credit lak an tum ve ve thung tia sawi a ni bawk a.
Chinese Foreign Ministry thupuangtu Mao Ning chuan “Cina hi G-20 a African Union member ni tura thlawp hmasa ber a ni” tiin a sawi a. “China-Africa Leaders’ Dialogue thla kaltaa neihah pawh president Xi Jinping chuan China chuan G-20 a AU full membership a thlawp tlat tur thu a sawi a. China leh AU te chu high-level China-Africa community building lama pawimawh tak niin khawvel huap pawha dikna lekkawh a nih theih nana hma la dun an ni a. China chuan global governance lamah AU in pawimawhna thuk zawk a neih a duh a ni,” tiin Mao chuan a sawi a. hetih laiin Russian media-te chuan Moscow chu AU member ni tura thlawptu hmasa ber an ti ve thung.
Kumin G20 meeting chu President ni mek India-in a thlenah ropui taka kalpui a ni a. Kum tluanin meeting 200 chuang Indian cities 60 chuangah neih niin Indian G20 presidency chu khawvel huapa chawilar tumna a nasa hle.
Delhi khawpuiah chuan billboard leh poster turu leh lian tak taka tar niin chungah te chuan Prime Minister Narendra Modi thlalak tarin palaite lawmna thuchah a sawi te nen pholan a ni bawk.
India chuan thlengtu a nih ang leh a president lai a nih angin summit chu declaration siama khar a tum ber a ni a. Mahse, chu chu thil awlsam a ni hauh lo Ukraine indona avangin ngaihdan inang lo a nasa em em bawk a.
Nikuma Indonesia-a G20 summit pawh kha Ukraine indona avangin ngaihdan inang lo tak tak awmin declaration pawh hmanhmawh taka siam chuk chukin a awm phah tawh bawk a. Nikum ai daihin kuminah thil a harsa zawka ngaih niin Russia leh China te chuan khawthlang ram te duh dan kalpui loh an tum bur a, US chuan Ukraine indona demna lo chu engmah pawm a tum dawn lo tia sawi a ni bawk.
Kumin hian Russian president Vladimir Putin leh Chinese president Xi Jinping te chu an tel loh avangin thutlukna siama tiharsa zual tih ni a. Russia chuan Foreign Minister Sergey Lavrov leh China chuan Premier Li Qiang te tir thungin mahse anni chuan thutlukna an siam hma in an hotu lu ber te an rawn zel a ngai lo thei dawn lo a ni.
G20 foreign leh finance minister meeting kumin kumtir lama neih pawh joint declaration siam thei lova tihtawpin a lo awm tawh a. India chuan Ukraine buaina chuan ram thang mek te intelkhawmna Global South te mamawh leh ngaihmawh a tihbuai loh a beisei hle a ni.
G20 hian khawvela economic output pum atanga 85% lawih hauhin khawvel sumdawnna 75% a hauh bawk a. Khawvel mipui hmun thuma thena hmun hnih awmna a ni bawk a. India chuan G20 chuan an zinga tel ve lo te ai a awh tia sawiin hei vang hian Global South aiawh berah a inchherchhuak tawh a ni.