Sawrkarin Aizawl Municipal huamchhunga LPG home delivery kalpui tura a tihnaah chuan, online-a booking titute chu gas agency-ten an inah an dah sak ngei tur a ni a, chu chu dan dinglai a ni tih Food Civil Supplies & Consumer Affairs minister K Lalrinliana chuan a sawi.FCS&CA minister hian Aizawl veng 29-ah LPG home delivery kalpui mek a ni tih a sawi a. Distributor tina delivery boy-ten gas bur chu inchhungah ngei an dah bakah a bukna an ken tel thlap a ngai tih a sawi. Gas home delivery booking chu darkar 48 chhungin distributor-ten an dah hman ngei ngei tur a ni, tiin, an dah hman lo emaw inchhungah ngei an dah lo emaw a nih chuan 2314375 leh 1967 toll-free ah consumer-ten an complaint thei tih a sawi a ni.
Aizawla distributor 11 awmten an huamchhunga veng an thlanchhuah, veng 29 zingah veng 11 – Zuangtui, Muanna Veng, Selesih, Ainawn (Govt Complex), New Capital Complex, Armed Veng South, Chite, Zemabawk, Tuikhuahtlang leh Venghnuaiah chuan tha taka kalpui tawh tih a sawi.
Furpui laiin hmun thenkhat, lirthei kalpawh theih loh palh hlauhthawn awm zual khuaa mipuiin buhfai an tlakchham loh nan an mamawh tur ang zat an chhek khawl lawk thin a, kuminah heng hmun huamchin, kudam 75-ah chuan December thleng daih tur khawlin, kawngpui chhia in a tihbuai loh tura ngaih khua leh veng tan pawh thla thum daih dah khawl vek a ni tawh tih a sawi a ni.
Sawrkarin buhfai man toa a lei, man tlawm zawka mipui hnena a hralh leh avangin sawrkar hian sum a hloh viau tura ngaih ni mah se, engemawzat hmuh let leh a nei tih K Lalrinliana hian a sawi a. Kum 2019 atanga vawiin thlenga sawrkarin sum a hmuh let zawng zawng chu Rs. 4,71,82,29,894 a ni tih a sawi bawk.
Sawrkar laipui hmalakna in, Mizoram pawhin hlawhtling takin One Nation One Ration Card (ONORC) programme a kalpui tih a sawi a. He programme hnuaiah hian mitinin an ration card neihna kher ni lo, khawi retailer (Fair Price Shop) ah pawh an thlatin quota an la thei tih sawiin, August 2022 khan ONORC hnuaia buhfai latu ration card awmzat chu 299 a ni tih a sawi a ni.
Agency-in online booking ti te home delivery an tihsak tur a ni – FCS&CA minister
