AGT-ah Simon-a’n a talent a entir leh ta

AGT-ah Simon-a’n a talent a entir leh ta
Simon Cowell hi rimawi lamah na na na chuan pa beng fing ber te zingah chhiar tel loh a har ngawt ang. Talent show chi hrang hrang, American Idol, X Factor, Britain’s Got Talent leh America’s Got Talent-ah te judging panel-ah a thu thin a, heng show hrang hrangah hian rimawi lama a beng fin zia leh zaithiam te talent a hai chhuah thiam zia hi khawvelin a lo hmu fo tawh a, tun tumah pawh America’s Got Talent-ah a thiam thil a phochhuak leh ta.
AGT season 20 audition-ah Simon hian a thlirtu mipui leh contestant ngei pawh barakhaihin, thil dangdai tak a thlen tir leh ta tlat. Audition-ah hian pitar pakhat, Gina Bellina chu stage-ah inlanin, a tunu, Lilliana-i’n a hriat lohin AGT a tel turin a hmin a lo pek sak niin a sawi a, “Ka hriat miah lohin a lo ti fel a. Heta ka rawn inlan hma ni hnih vel lekah ka hre ve chauh. A timak ka tiviau a, mahse, keimahah rinna a lo nghat ve miau si a,” a ti.
Tichuan, Bellina chu a zai ta. Rimawi rem saktu zingah a tunu, Lilliana pawh telin, guitar a perh a. Bellina pawh a kum te ngaihtuah chuan rin ai takin a zai thei phian. Mahse, a zai laklawh laiin Simon Cowell chuan a zai a tihtawp tir a. “Ngawi lawks” tiin, Lilliana lam a hawi a, “Kha hla kha i phuah a ni em? A ni maw? I sa thei em?” a ti ta mai.
Lilliana chu zam hmel angreng takin a pi aia audition-a zai tur chuan a han insiamrem a, a zai ta. A zai thei tlat. Mipui pawhin an lawm, judge te pawhin an lawm. A zai zo ta.
Simon chuan, “Gina (a pi) hetah i rawn hruai thleng a, mahse, mak takin Gina hian hetah a rawn hruaithleng ve thung che a nih hi. I zaithiam zawk tlat. I cool, mipui pawhin an tan dawn riau chein ka hria. Chuvangin, Gina, Lilliana zai hi i remtih zawk theih chuan boruak a dik thei dawn tlatin ka hria,” a ti a. Gina chuan audition chu a tunu, Lilliana tan a kian ta zawk a ni.
Judge zinga mi Sofia Vergara chuan, “Simon hian zai zawk turin ti lo che se chuan hetiang khawpa aw mawi i nei tih hi kan hre dawn miah lo. Mipui an lawm ngei che ka ring,” a ti ve bawk.
Mahse, judge te ngaihdan erawh a thuhmun vek lo, Mel B chuan, “Sawi deuh tawp ila, kei chu min hneh ve lem lo,” tiin “No” tiin a vote a, mahse, judge dang pathum, Mandel, Vergara leh Simon ten an ‘Yes’ vek avangin audition a paltlang ta a ni.