AI video vangin eptuten Assam BJP lakah thubuai thehlut dawn
Assam-a eptu party-te chuan social media-a artificial intelligence hmanga siam video thehdarh sawi hlawh tak avangin BJP lakah police hnenah complaint an thehlut dawn.
Video hi Assam BJP (@BJP4Assam) X-ah dah chhuah niin an state chuan ‘Muslim-in an luahna’ an tawng mek niin tar lan a ni a. He thil hi politics hruaitu tam takin an sawisel a, Hyderabad MP Asaduddin Owaisi-a pawhin BJP chu ‘Muslim awm lohna India din tumah’ a puh.
Assam Congress chief leh Lok Sabha-a deputy leader ni mek, Gaurav Gogoi-a chuan video hian Assamese khawtlang nun leh nun dan phung dik lo takin a lantir niin a sawi.
“BJP IT Cell hian thu, chet dan leh mi lem hmang hian Assamese khawtlang nun ang a pho chhuak zo lo,” tiin X-ah a tar lang.
“Assam hi Mahapurush Srimanta Sankardeva, Azan Pir, Swargadeo Siukapha, Lachit Borphukan leh Bhupen Hazarika te chawm len a ni a. Rannung, lungalhthei, kuhva rah leh ruihhlo tawlh nen hian Assamese rilru hian inzawmna a nei lo va. Assam state ropui tak hian sang zawk thlen thei tur politician a mamawh a ni,” a ti.
Gogoi-a hian Congress party-in Guwahatio-ah police hnenah an thlen dawn tih a sawi bawk.
A thu dah chhuah dangah an party-in an state tana hmathlir a neih tar langin, “Pilot, engineer, doctor, entrepreneur, banker leh sumdawng awmna khawtlang din kan tum a. Assam hi thawhrimna hmanga huatna, inen hranna hnuai chhiah a, mipui rorelna hmanga mi pakhat thuneihna tihchhiat te, mi tin zah taka en te kan din dawn a ni,” a ti.
Eptu party lian dang, All India United Democratic Front (AIUDF) pawhin BJP video dah hi an sawisel a. “Assam BJP hian AI video hmangin hlauhna thlen a duh a ni,” tiin Aminul Islam, MLA leh AIUDF general secretary chuan a sawi.
“Mi tam zawk hnenah BJP hian thuneihna chang lo ta se Muslim-ten an luah hneh dawn tih pho chhuah an duh a. Muslim dah hniam an tum a, he video hi inhuatna thil pho lanna a ni a. Thubuai siamsak an ni dawn a, election commission-ah pawh thlen kan tum,” a ti.
Sawiselna chhangin Assam BJP thupuangtu, Rupam Goswami chuan video hi chhanin, “Assam BJP chuan he video hian thu dik a lantir niin kan ngai a, kan state-a mi chengte inthlak zel hi nunna, khawsak phung, ram leh nun dan phung tan a hlauhawm mek zel a ni,” a ti.
Assam hi nakumah an inthlang dawn a, hei vang hian eptu party an tan rualin BJP pawhin hma an la mek zel bawk a ni.
AI video vangin eptuten Assam BJP lakah thubuai thehlut dawn
