Thalaite zingah aia upa zahna chuan hniamlam a pan mek zel tih sawiin hei hi thil pawi tak a ni tih minister Lalruatkima chuan a sawi.
Tuikual High School chuan MBSE-in HSLC result a tihchhuaha hlawhtlinna changte lawmpuina ‘Graduation Day’ an hmang a. He hun hmanpuitu Aizawl West-II bialtu MLA ni bawk Lalruatkima chuan thangtharte zingah nu leh pa zahna a tlahniam hle nia a hriat thu sawiin, zirlaite chu an nu leh pate hlut zia hrethar a, nu leh pa zahna kawngah tan la turin a fuih. A bikin thalaite zingah aia upate zahna chuan hniamlam a pan mek zel a ni, tiin, hei hi thil pawi tak a ni tih a sawi. “Aia upa zah hi Mizo nun zemawi tak pakhat a ni a. Pi leh pu atanga Mizote nuna bet tlat aia upa zah leh thuawih chu kaihthawh thar a ngai a, aia upa te zah a, nu leh pa chawimawi thiam ang che u,” tiin zirlaite a fuih.
Zirna chu thiamna leh finna petu, mi ropui leh thiltitheia mihring siamtu a nih avangin zirlaite chu uar zawka lehkha zir leh chhhiar thin turin a chah a. Hlawhtlinna sang zawk chang turin chanchinbu leh lehkhabu lam chhiar nasat a ngai tih sawiin, chanchinthar en tam turin zirlaite a chah bawk.
Kum 1952 atanga India-in ‘Family Planning’ a kalpui hnu ah Mizoramah pawh fa neih tlem inzirtirna uar taka kalpui a ni tih I&PR minister hian a sawi a. Mizoram dinhmun ngaihtuah chuan fa neih tam a ngai hle thung, tiin, “Khawvelah tam a pawimawh zia a takin hmuh mek a ni a; Mizoten fa kan neih tam a ngai a, chumi tur chuan nupui pasal pawh a hma lamah neih a ngai a ni,” a ti.
Mizoramah kumtina nau piang zat atanga chhut chuan reiloteah hnam anga ral a hlauhawm a ni, tiin, fa neih tam lamah harh thar a ngai hle tih a sawi a ni.
HSLC-ah Tuikual High School atangin candidate 65 an awm a, zirlai 48 an pass a, tunah zirlai 155 an nei mek.
Aia upa zahna a tlahniam zel – Lalruatkima
![](https://theaizawlpost.org/wp-content/uploads/tap_logo-min-large.jpg)