Mizorama MLA inthlanpui neih tur thlirlawkin All India Congress Committee (AICC) hotute chuan Mizoramh an tlawh a, an party hotute bakah kohhran hruaitute leh NGO hruaitute an kawm ang.
Union minister hlui, AICC (i/c Mizoram) Bhakta Charan Das, AICC Mizoram observer Sachin Rao, AICC Media & Publicity chairman Pawan Khera, AICC Social Media chairperson Supriya Srinet, party spokesperson Mathew Antony leh Dr Summit Dubey te an ni a. MLA inthlanpui awm tur inbuatsaihna media & communication tha zawk a awm theihna’n nhma an la dawn a ni.
AICC team hotu Bhakta Charan Das chuan kum 2024-a India rama MP inthlan hun atan Congress party leh a thawhpuiten Hindu lal ram din tumtu BJP sawrkar paihthla ngei turin ‘INDIA’ tih pawl an din a. India ram puma sakhaw zalenna duh vang a ni tia sawiin, “BJP-in India ram hmun hrang hrangah Hindu lal ram a pian theihna atan hma a la mek a. A bikin North-east lamah hma an rawn la nasa hle. Mizoram pawh a tuar mai thei dinhmuna ding (target) zing ami in ni. BJP sawrkar hi sakhaw tenau zawkte tan a him loa, khua a tlai hmaa Mizoram mipuiin ngaihtuahna thar in hman a, kum 2024-a central inthlan huna sawrkar mai tur Congress party leh a thawhpuite hi MLA inthlanah pawh in lo thlantlin ngei a ngai a ni,” a ti.
Mizoramah Congress party hmalaknaa sakhaw zalenna duhtu pawl Mizoram Secular Alliance din a ni chu lawmawm a tih thu AICC hotu hian a sawi a. Ram leh hnam chhanna tak tak sakhaw zalenna ngaihtuahtu Congress party leh a thawhpuite lo vote tling ngei turin Mizoram mipui a sawm tih a sawi. “Kan sakhaw biak dan ber a zalen loh chuan India khua leh tui tha nih a har a, retheihna in min umzui a, kan dikna chanvo nekchepin a awm bawk. Chu zawng zawng tuartu chu mipui kan ni,” a ti.
AICC hotuten Mizoram tlawh
