Aieng sawngbawlna, Turmeric Processing Unit chu Champhai Tlangsamah din thar a ni a, District Horticulture Office Champhai nen Thawhlehni khan minister TJ Lalnuntluanga chuan a hawng.
DHO office leh Turmeric Processing Unit ruahman chu Champhai district mipui, a bikin kuthnathawktute tan hmasawnna a ni tih minister hian sawiin, hei bakah Tlangsam Winery leh Passion Fruit Processing Unit din tum chu kuthnathawktuten eizawnna ngelnghet an neih theihna leh an tharchhuah anmahni ngeiin sawngbawl a, an hlawk zawkna tura sawrkarin a ruahman a ni tih a sawi.
Turmeric Growers Society Tlangsam chairman Lalengzama sawi danin, society hi kum 2004-a din a ni a, khawl engemaw zat an bun tawh a, loan lak rulh theih loh avang leh rokhawlhna hrang hrang avangin hma an sawn thei loa, an bialtu MLA, minister TJ Lalnutluanga hnenah an harsatna thlenin, a ni hian Horticulture department kaltlangin Processing Unit hi a ruahman sak a ni.
Turmeric Processing Unit hi SASCI 2020- 2-21 sum, nuai 103 senga ruahman niin, civil works atan nuai 52.58 ruahman a ni a; kumin June 19 khan bun tan a ni. Land development, fencing, main gate, internal road, drainage, factory building, office furniture, computer leh printer te ruahman a ni a. A bak zawng hi khawl mamawh leina atana hman niin, washing unit, slicing unit, solar drying unit, grinding machine, packing machine, transformer leh electric distribution system te lei a ni. Khawlin chak taka hna a thawh theih nan kawlphetha 24×7 mamawh ruahman a ni bawk.
Aieng sawngbawlna din
