All India Football Federation (AIFF) exe-cutive committee chu New Delhi-a Football House-ah tunkar Ni-ngani khan thukhawm-in, he huna thil chi hrang hrang an chaiho karah Mizo hmeichhe referee Lalthansangi chung-chang chu an sawilan zingah telin, hmeichhe football match bakah mipa game-ah pawh official a nih theih an beisei thu tarlan a ni.
Bilkhawthlir nula hi kumin June ni 28 daih tawha AIFF Referee Committee-in referee category 2 a tihchhuah-ah tlingin, Mizoramin hmeichhe national re-feree la chawl lo pali a neih tlinna chiah niin, midang pathumte chu F. Zohmingliani (Nutei), Jim Zaithantluangi leh Lalhruaizeli Khiangte (Nupuii)-te an ni.
Sangi hian national referee tling turin fit-ness, theory leh prac-tical exam a paltlang a, test hi India ram hmung hrang hranga kalpui a ni nghe nghe.
Ningania AIFF exe-cutive committee mee-ting kha AIFF president Kalyan Chaubey chuan kaihruaiin, sawmbik zingah Mulrajsinh Chu-dasama, Caitano Fer-nandes leh FSDL aiawhte an tel.
President hian FIFA nena Santosh Trophy chungchang leh project dang engemawzat chungchang chipchiar taka an sawiho thu executive committee hi hrilhin, tun season-a Arunachal Pradesh-in a thlen tur Santosh Tro-phy atana National Football Championship chu ‘FIFA Santosh Trophy‘ tia hriat a nih tur thu a sawi.
“FIFA nena kan sawiho hnuah Santosh Trophy hi tunah chuan FIFA Santosh Trophy tia hriat a ni tawh dawn tih ka puang thei hi ka lawm hle. Hei hian FIFA official team pakhat chu Arunachal Pradesh official-te nen tourna-ment kalpui dan tur meeting nei turin an lo kal dawn tihna a ni,” tiin Chaubey chuan a sawifiah a, FIFA pre-sident Gianni Infantino pawh nakkum March ni 9 emaw ni 10 emawa final khelh turah a tel ngei an beisei thu a tarlang tel.
FIFA Chief of Glo-bal Football Develop-ment leh coach lar tak Arsene Wenger chuan tun thla tawp lamah India a tlawh dawn a, Arsenal boss hlui lo zin tur chungchangah hian AIFF president chuan India thalaite hmasawnna tur rua-hmanna leh project hrang hrangah bung thar a hawng dawn tih a puang tel.
Chaubey chuan sawizawmin, “FIFA-AIFF academy din tura ruahmanna siam chung-changah Wenger nen hian chipchiar takin kan sawiho dawn a, kan ruahmanna chu pakhat ni loin academy panga, India rama zone tina pakhat theuh neih a ni.
“India ram lian tak a nih avangin keimahni mimal ngaihdan chuan academy pakhat chauh hi a tawk dawn lo, batch khatah player 25-30 chauh an awm theih dawn avangin. Chu-vangin, academy panga tal dinna tur project siam kan tum a ni,” a ti.
He meeting-ah hian ‘goalkeeper academy’ din tumna te, I-League tihlar lehzualna’n match thenkhat chu Jhar-khand, Bihar leh Uttar Pradesh khawpuiahte khelh a nih theihna tura rawtna pawm a ni.
AIFF rorelna sangah Sangi hming lam ri
