Aigupta mipui chhan turin
Salah dam hman dawn em?
Zanin zanlai thlen hma hret dar 11:30 hian Egypt leh Asia khawmualpui ram zinga tun Fifa World Cup kal meka dam awmchhun ni tawh Australia-te’n last 16 luh an inchuh dawn a, Egyptian national team innghahna lian Mohamed Salah a fit hman an beisei rih phawt.
Thawhlehni khan Egyptian Football Association chuan social media lamah an stariker inhliamin team ruala training a kalpui lai thlalak dahchhuak chungin a caption-ah ‘The King is back’ tih an ziak a, chawn tha na avanga buai leh rih Salah chu zanin game atana inpeihchhuak hman turah an ngai.
Salah hian group match pakhata Iran nen si khat ve ve thuna an inhnehtawkna game-ah khan second half tir lam minute 57-na lekah khelmual chhuahsanin, Pharaohs chu knockout stage luhpui tho mah se an thiampuipa ber a inhliam miau avangin Egypt mipui lawm a kim thei lo.
North African-ho tan kumin hi World Cup tum li an khelhna niin, Group G lamah Belgium, New Zealand leh Iran laka tlawm nei loin an ram chanchina a vawi khatna atan knockout stage an lut a, zanin hian an thlen chin atanga hmasawn leh hret tumin Australia an hmachhawn dawn a, Salah an mamawhna a sang leh dawn.
Seattle khuaa a chawn chho kaihza na kha endik a nih hnuah kum 34 mi hian Egyptian camp lamah enkawlna (intensive rehabilitation programme) dawng nghal char charin, Thawhlehni khan Egupt captain hian training a zawm leh thei a, Socceroos nen Dallas khawpuia an insut hunah hian first eleven em an chantir loh pawhin second half-ah tal an luhtir a beiseiawm.
Liverpool forward hlui hian team ruala training a zawm theih hma pawhin amaha damna kawng (individual recovery session) a zawh reng tho a, an head coach Hossam Hassan pawhin inkhel thei lo tur khawpa hlauhthawnawm a nih loh thu a sawi tawh nghe nghe.
Salah hian tun tournament kal laiah pawh Pharaohs tlarhma tana a la tangkaizia pholang kal mekin, New Zealand laka 3-1 hnehna an chan tuma goal a khung bakah tun thlengin assist tum hnih a siam chhuak tling tawh.
Zanin hian a inlan thei lo palh hlauh a nih chuan Egypt attacking mawhphurhna pui ber chu Omar Marmoush kuta tla tur a nih a rinawm.
Manchester City forward Omar-a hian Iran game-ah khan starting line-up a chang pha lo a, second-half substitute nih kha a lawm lo hle tih report a awm a, Australia lakah hi chuan a dinhmun ngai luahkir leh a tum ruh hle tih hriat a ni bawk.
Kum 27 mi Marmoush hian kumin World Cup kal mekah chuti teh vakin hming a la chher lo a, Zirtawpni last 32 game hi a tan chance pawimawh a ni dawn a, Salah a theih loh ngat phei chuan a mawhphurhna hi a sang hle dawn a ni.
Egypt selection luhaina lian ber ni mek chu tlarhnung lam hi a ni thung.
Iran game-ah khan minute 14-na lekah khup na avangin centre-back Mohamed Abdelmonem lakchhuah a ngai a, Salah ang bawkin Australia match khel thei tura fit hman tumin tan an khawhpui ve mek bawk a ni.
Egypt-in substitute panga an thlak hnu, midang luhtir tur an neih tawh loh avanga chawn tha na chunga minute 90 chhung khel tluan ta ringawt left-back Ahmed Fatouh erawh zanin game khel lo tura ngaih ngheh a ni tawh.
Defender dang Hamdi Fathi leh Hossam Abdelmaguid-te pawh fitness issue buaipui ve mek tharum ngaha hriat lar kumkhua, tlarhnung lama inthununna nei thaa sawi hat ni bawk Socceroos hmachhawn tur team remkhawm chu a hahthlak deuh dawn niin a lang!
Boruak rit angreng tak hnuaia an beiseina mei eng neih mek chu an captain roh bik Salah dam hman tura an beiseina kal mek hi niin, World Cup knockout game hnehna hmasaber an beisei mekna kawngah engti ang takin nge team a puih dawn kan thlir ang.
Aigupta mipui chhan turin Salah dam hman dawn em?
