Aikal la an awm chuan hrem dawn Natna khirh nei ngaihnathiam bik lo

Aikal la an awm chuan hrem dawn
Natna khirh nei ngaihnathiam bik lo
Aikal la an la awm chuan, aikal latu leh a chunga officer awm chu danin a sawi anga hrem an ni dawn a, natna khirh bik avanga hna thawk thei lo pawh ngaihnathiam theih an ni loa, rilru dam taka an chawlh theih dan erawh sawrkarin a ruahman sak tih chief minister Lalduhoma chuan a sawi.
Assembly Session-a zawhna chhangin General Administration changtu chief minister chuan, aikal la hi tunah chuan an awm awm hriat a ni tawh loa, an lo la awm palh a nih erawh chuan House member an ni emaw tute pawhin hriattir turin a ngen tih a sawi.
Aikal la tihtawpna atan inchinfelna hun (grace period) an siam a, chumi a pelh tawh hnua aikal la an manchhuak a nih chuan dan angin action an la dawn tih sawiin, “Hei chen hun kan hawng tawh a, chu pawh zah loa aikal la an la awm a nih chuan, anmahni leh a thawhna officer chungah a tul angin action kan la ve ve tawh ang. Hremna an tawh ang angah an phunnawi thei loang,” a ti.
Natna khirh bik vei mek aikal late ngaihnathiam theihna a awm lo tih chief minister hian a sawi a. Chutihrualin sawrkarin department tinah Service Review Committee a din a, an ni hian an department theuhah eng vang pawha thawk chhunzawm thei tawh lo te tan, special voluntary scheme an duan hnuaiah rilru dam taka an chhuah theih dan tur ruahman pui an ni tih a sawi.
“Sawrkarin a hnathawkte ah investment a ti a, a investment tihna chuan production a neih tawh loh chuan a thawk zel thei lo tihna a ni a, thawk thei lo na na na chu an chawlh mai a ngai dawn. A pawnga puia in ban erawh kan tum loa, hnemhnang tak leh rilru nuam tak chunga an chawlh theih dan kawng hawnsak a ni a, chumi kawng chu an zawh mai tur a ni,” a ti.
Samagra Siksha pawh state sawrkarin hlawh a tum thensak ve tho an nih avangin aikal lak phal lohna hian a huam vek tih a sawi bawk.