Lamherh school-a thawk, sawrkarin aikal la tawh lo tura a tih tawh hnu pawha lalui tlat a awm tih Hindi Zirlai Pawl chuan an sawi a. Sawrkarin a ban lo a nih chuan he school khar thleng pawha hma an lak zui tur thu an sawi.
Mizoram Hindi Zirlai Pawl (MHZP) Gen. Hqrs. thuchhuak chuan Hindi stream-in harsatna namen lo a tawh hnu in, sawrkar leh Education minister Pu Lalchhandama Ralte hmalakna azarah Hindi zirna in rahbi thar a rap mek a; chutihlaiin centrally sponsored scheme hnuaia thawk high school leh middle school Hindi zirtirtuten sawrkar nen inremna an neih ngaipawimawh loa aikal laluite chungah sawrkarin huai takin, an hna atanga ban (terminate) thleng pawha action la turin an ngen tih a sawi.
SDEO Saitual hnuai Lamherh HSS (RMSA) a pensioner rawih nawn leh chuan appointment a hmuh atanga tun thlengin aikal a lak avangin sawrkarin explanation a call tawh bakah show cause notice pe in, 2023 August 4 hma ngeia chhang tura hun pek a ni chungin, he mi hian transfer a dil nia hriat ala ni lehzel chuan amah ruaitu sawrkar leh department a zah lo mai niloin, engahmah a ngai loah MHZP chuan ngaiin, a la thutak hle tih a sawi.
‘Mahni hnaa tui tawh lo leh thawk tha peih lo hi sawrkar hian tun thla, August 2023 chhung ngeiin a hna atanga ban (terminate) a nih theihna’n hma la turin kan phut a. Sawrkar atanga chanchin lawmawm hriat tur a awm loh zel chuan, a thawhna khua VEC nen tangrualin, a tul a nih chuan school khar thleng pawha hma lak a ni ang,’ a ti.
MHZP chuan englai mahin aikal lak a pawmpui ngai loa, rinawm leh taima taka mahni thawhnaa awmte chu chhuanawm a ti hle tih a sawi a. Aikal late hian an agreement an bawhchhiat chuan MHZP-in a enzui anga, a tul angin hma a la ngei dawn tih a sawi.
Aikal laluitu ban turin sawrkar ngen
