Sum tihchingpen thubuaiah All India Radio Aizawl Station-a thawk thin mi pathum chu court-in thiam loh a chantir a, hrem an nih dan tur a la puang leh ang.
January 2012 atanga June 2012 inkar khan hetihlaia AIR Aizawl Station-a assistant director Zosangzuala, programme executive Lalnunziri leh LDC Judy H Lalmuanpuii te chuan AIR Aizawla thawk tur angin, a tak awm si loin casual production assistant 20 chhawr angin an ziakfel a, heng ho hi tum 54 chhawr anga ziah niin, hemi atana sawrkar sum kalral chu Rs. 2,60,444 nia chhut a ni. An pathum hian a tak awm silo in music artiste 39 hla record anga ziah a ni bawk a. Hemia sawrkar sum kalral hi Rs. 6,08,916 nia chhut a ni.
AIR- Directorate, Akashwani Bhawan New Delhi-in budget estimate 2011- 2012 atan AIR Aizawl hnenah North East Special Package hnuaia cheng nuai 8 leh Payment for Programme and Special Services of IEBR (Internal and Extra Budgetary Resources) hnuaia nuai 86.73 an pek khawih chingpennaa puh an ni a. He thubuai hi CBI-in a chhui a a ni a, a taka thawk si loa hlawh an pek hi cheque hmanga buaipuiin, music artiste-te phei hi chu ‘performance certificate’ an siamsak thlap a ni.
Prevention of Corruption Act 1988 hnuaia dan tlawhchhanin Zosangzuala, Chanmari Aizawl; Lalnunziri, Tuikhuahtlang Aizawl leh Judy H Lalmuanpuii, Khatla South Aizawl te chu thiam loh chantir (convict) an ni a. Convict an nih angin bail leh bond awmte sut (cancel) sak an ni a, court atang hian lung ina dah luh nghal an ni. February 5 (Thawhtanni) hian court-in hrem an nih dan tur a puang ang.
AIR-a thawk thin pathum court-in thiam loh a chantir
