Airforce kuta Lengpui Airport
hlan lo turin sawrkar kan ngen
– Lalnunmawia Chuaungo
Lengpui Airport enkawl zel dan turah state sawrkar chu Indian Airforce kuta hlan lo hram tur leh, state-in a enkawl thei lo a nih pawhin Airport Authority of India kuta hlan zawk turin an ngen tih Congress senior vice president Lalnunmawia Chuaungo chuan a sawi.
Congress hruaitu sawi danin, Lengpui Airport enkawl chungchang zirchianga rawtna siam tura Mizoram sawrkarin a din Working Committee report-ah Indian Airforce (IAF) ah chauh beiseina an hmu nia ngaih theih a ni, tiin, IAF kuta hlan a nih chuan, anmahni chauhin an tlawhpawh theih tur airport bulhnaiah ram pek belh an ngaih ngei a rinawm bakah commercial flight tana airport tih changtlun lam chu an thupui ber a nih rinawm loh hle tih a sawi a ni.
“Inremna fel tak nen IAF kuta hlan emaw inenkawl tawm (joint management) emaw hnuaiah hian, Defence ministry atanga sum ruahman hmanga airport tihchangtlun hna engemaw chen tih theih a ni ang. Amaherawh chu IAF mamawh ngaihpawimawh hmasak a ni dawn tih hai rual a ni loa, IAF leh Zoram mipui mamawh hi inpersan tak tak tam tak a awm dawn tih a chiang,” a ti.
Lengpui Airport ram chu acre 570 vel chauh niin, ram leh mipuiin kan mamawh anga commercial airport tih len a, tih changtlun zel nana kan mamawh tur pawh a daih fumfe dawn loh lai a, IAF hman bik tura ram engemawzat sahthlak chu tih chi a ni lo tih a sawi.
Sum harsatna avangin Lengpui Airport chu a la changtlung loa, state sawrkarin sum tam tak hloha a enkawl mek leh kum tam tak sum hloh char charna tur a nih avangin private company atang chuan beisei tur a awm lo tih Lalnunmawia Chuaungo hian a sawi.
Duhthlan tur awm zingah, state sawrkar kuta awm zui a, sawrkar laipui scheme kan chan ve atanga tihchangtlun chhoh zel a, kumtin a enkawlna sensoa cheng nuai za tel hloh char char emaw, inremna fel tak nen Airport Authority of India kuta hlan a ni tih a sawi.
“Sum hloh reng rihna tur a nih avangin AAI hian an enkawl zui chak lem loa; tunhnaiah chief minister pawhin AAI chuan an enkawl zui chak lo niin a sawi. AAI level ngawt ni loin, sawrkar laipui hotute khu political level-a sawipuiin a chinfel theih a rinawm,” a ti.
Congress sawrkar lai khan AAI kuta hlan hi khatihlaia chief minister Pu Lal Thanhawla bulah a sawipui a, AAI hotu lam pawh a dawr fo hman tih Mizoram chief secretary hlui Lalnunmawia Chuaungo hian sawiin, MNF sawrkarah khan hma lak chhunzawm tumin a sawipui leh a, an bengkhawn lo mai niloin, tuna airport thawmthat dan khu kalpui a ni ta zawk tih a sawi a ni.
Lengpui Airport sum hmuh leh hman:
MPCC senior vice president Lalnunmawia Chuaungo sawi danin, 2022 -2023 chhung khan kaw hrang hrang atangin airport hian cheng nuai 613 chuang hret a lalut a. A hmanralna lamah, CRPF company hnih duty-te rawihnan kumtin nuai 500-600 inkar vel senral a ni a; state police ho duty-ah nuai 320 vel, power hman man leh a enkawlna dang zawng zawngah nuai 546 vel nen, sawrkar kum khata senral hi nuai 1500 vel a ni.