Airport-ah political level-a centre dawr turin Mizoram sawrkar ngen

Airport-ah political level-a centre
dawr turin Mizoram sawrkar ngen
Lengpui Airport Forum chuan Lengpui Airport awm zel dan tur chungchangah political level-a India sawrkar dawr tul an tih thu booklet “Indian Air Force (IAF) hnena Lengpui Airport hlan hi a him lo” tih siamin an sawi.
Booklet tlangzarhtu PC Lawmkunga, IAS (Rtd) chuan, Mizoram sawrkarin IAF kuta hlan a tumnaah Airport Authority of India (AAI) kuta a beisei awm loh vang nia sawi a nih laiin, a zu dawr dan erawh a nep deuh nia a hriat thu a sawi. AAI kuta hlan a beiseiawm loh nia sawi chungchangah service atanga a lo hmelhriat Civil Aviation ministry secretary V. Manga a bia tih sawiin, a ni chuan an lo ralkhat hriat thu a sawi a, sawrkar atangin rawtna awm se ngaihtuah chi nia a hriat thu leh a kaihhnawih ministry-te nen pawh sawihoa ngaihtuah theih a ni, tia a lo chhan thu a sawi.
“AAI dawr chungchangah Mizoram sawrkar hian a dai thuk loa, thuneitute a la pawh lo niin ka ngai,” a ti a. Sum neih loh avanga IAF kuta hlan tum chu a dikna chin awm thei mah se, sum neih dan kawng an dap em, tih chu zawhna awm thei a ni tih a sawi. Finance Commission member a lo biak pawhin Mizoram sawrkarin memorandum siam chu nise, ngaihtuah theih tur a ngaih thuin a lo chhang niin a sawi bawk.
Sawiho zuinaah Central YMA president hlui Vanlalruata chuan a tawnhriat tawh atangin IAF kuta hlanin security thilah harsatna awm lo tura anga sawi chu rin ngam harsa a tih thu leh AAI dawrna mumal a awm lo chu pawi a tih thu a sawi. “Theihtawp chhuahin dawr beidawng ni ila chu thuhran a ni,” a ti.
Thusawitu dang, Lalngheta Sailo IPS (Rtd) chuan airport 100 chuang fe enkawl leh airport siam a tul anga tichangtlung tura ministry puitlingin a din AAI-in sum a nei lo, ti zawnga sawi chu thudik anga ngaih tur nia a hriat loh thu a sawi a. IAF-in an rawn tawktarh ang chu a experience atang chuan, an inhung that em avangjn mipuiin chhawr tangkai har a tih thu a sawi.
Lengpui YMA hruaitu Malsawmtluanga chuan Lengpui Joint Committee-in IAF kuta Lengpui Airport hlan rem an ti lo tih a sawi a. Mizoram sawrkarin AAI a dawr dan an lo hriat chin chu nep an tih thu a sawi. AAI-a thawk Gilbert Hnamte pawhin thu sawiin, flight schedule tihdanglam theih loh anga sawi chu tihdanglam a ni thin tih a sawi a ni.
Lengpui Airport chu AAI kuta hlan mai tha ber nia an hriat thu booklet-ah hian Forum chuan a tarlang a. Chief minister-in Civil Aviation minister leh Prime minister-te hi AAI hnena Lengpui Airport laksak turin dawr ngei se tih chu an ngenna a ni tih sawiin, political level-a India sawrkar dawr tul an tih thu an sawi.