Aizawl chawmtu tui lakna pathum
hman hunah tui hnianghnar beisei
Aizawl khawpui chawmtu tui lakna chu tunah sawrkarin pahnih a nei a, a pathumna tur leh a puitu tur dang siam mek niin, heng hi peih tep a ni tih PHE department hotute chuan an sawi.
Mizoram Public Health Engineering Department-in tunhnaia ram pum huap hmalaknaa titha nihna an neihte chu an department changtu deputy chief minister Tawnluia hoin Zirtawpni khan an puang a. Mipuiin tui hnianghnar an neih theihna tura ruahmannate an puangzar nghal.
Mizoram sawrkar aiawha heng lawmman thenkhat semnaa tel Irrigation & Water Resources minister C Lalrinsanga chuan kan thawh rah kan phochhuaha kan inlawmpui hian mipui an phur a, mipui an phur chuan ram a phur, tia sawiin, Mizoramin lawmman a dawnte chu buatsaihtute leh central ministry in an phurin he intihsiak hi an ngaihlu hle tih a hmuna an hmuh thu a sawi.
Aizawl khawpui hi tunhnai kum 40 chhungin a thang nasa a. 2011 Census atanga mipui awm zat chu 293416 a ni. Tunah chuan nuai 4 vel awm anga ngaih a ni. Mipui tui mamawhna a pung zel a, tunah hian ni khatah maktaduai litre (million litre per day – MLD) 30 atanga 35 mamawh anga chhut a ni. Aizawl tui chawmtu innghahna scheme pahnih – Greater Aizawl Water Supply Scheme (GAWSS) Phase-I hian mi 80000 chawm zo tura duan niin, kum 1988-a hawn a ni a. Tlawng lui leh Serlui infinna thlang atanga tui dawtin, nitin tui MLD 10.8 pump chhuak thei tura duan a ni. GAWSS-II kum 2007-a hawn niin GAWSS-I nena tangdun tura duan a ni a. Mi nuai 310000 chawm zo tura chhut niin, nitin tui MLD 24 pump chhuak thei tura duan, Tlawng lui leh Serlui infinna chhak atanga tui dawt a ni.
Aizawl hmarlam veng chawm tura duan, MLD 37 pump chhuak thei tur Tanhril Setlak rama ruahman chu SIPMIU hmalaknaa thawk mek niin, Aizawl khawpui tui harsatna sukiang then tura scheme siam tho, Aizawl chhimlam chuanhnuai veng thenkhat – Mualpui, Mission Vengthlang bakah Muallungthu tlangdung thingtlang khuate ZMC huamin mihring nuai khat vel fur lai (thla 5-6) chhung vel chawm thei tur duan mek a ni bawk.
“Heng ruahmanna nen hian MLD 70 vel Aizawl chawmna atan kan nei thei dawnin kan hria a, tui harsatna a sutkian ngei kan ring,” deputy chief minister chuan a ti.
Tunhnaia Tlawng lui nasa taka kam chuan a timangang a. A hmanhmawh thlak leh a muangchang thei deuh zawngin he harsatna hmachhawn tur hian an inruahman tih PHE hotute chuan an sawi. Cheng nuai 24 leh nuai 31.13 in chihnihin ruahmanna hmanhmawh an siam a, hei hi Tlawng lui pawhtu luite khuapna tur a ni tih an sawi. Muangchang thei deuh zawkah tuikhuah dan tur liantham deuh hi project siam turin consultancy firm an ruai dawn tih an sawi.
PHE department chuan Mizoram pumah mitinten tui an hnianghnar theih nan hma an la tih an sawi a. Sawrkar laipui hmalakna JJM hnuaiah Mizorama thingtlang in (rural households) 133060 awmah tun thlengin in 105627 ah tui connection pek a ni a, in 114828 (86%) ah tui connection pek a ni tawh. Hmarchhak state zingah Mizoramin hma a la tha ber a, tunah hian Mizorama thingtlang khua 728 (khawper telin) awmah khaw 316-ah in tinin tui connection an nei tawh a ni.
Kum 2023-2024 chhung hian tui connection 22485 pe turin sawrkar laipui hnenah bituk a ni a, heta tang hian tui connection 4318 pek a ni tawh.
Jal Jeevan Mission (JJM) hnuaia hnathawh that vanga national award dawn te:
I). Jal Jeevan Survekshan 2023 (October 2022 – March 2023) :
i) Aspirational District 117 zinga titha 21 thlan 1-na Mamit District
(ii) Aspirational District 117 titha 21 thlan 2-na Mamit District
(iii) District 740 atanga titha zual 127 thlan 3-na Kolasib District
(iv) District 740 atanga titha zual 168 thlan 5-na Saiha District
II) 2nd National Water Award 2019
Best Village Panchayat – North East Zone : 1-na Leng, Serchhip District; 2-na Ailawng, Mamit District
III) 3rd National Water Award 2020
Best Village Panchayat – North East Zone : 1-na Sialsir, Serchhip District
Tuihna humhalh kawnga thawk tha, tui pawimawhna kawnga zirtirna pe tha leh kalphung nei tha state-te hnena National Water Award pek
IV) Jal Survekshan Abhiyan 2022
Water Warrior Award : HS Lalawmpuii, Sairep VCP.
V) Swachh Bharat Mission Awards 2022
North East Zone – 2-na Mizoram
Kum 2021-2022 chhunga SBM-G hnuaiah North East Zone-ah Mizoram 2-na niin, lawmman hian cheng vaibelchhe khat a kengtel.