Aizawl College building
inhlan dan tur ngaihtuah
Higher & Technical Education minister Dr Vanlalthlana chu Mizoram Presbyterian Kohhran hruaitute nen an inkawm a, Sikulpuikawna Govt. Aizawl College building inhlan chungchang an sawiho.
Building inhlan fel dan tura hma lo la a, agreement duangtu tur Drafting Committee an din a. Higher & Technical Education director chu convenor atana ruat niin, department atang hian Committee member atan under secretary leh Govt. Aizawl College principal ruat an ni a, Mizoram Presbyterian Kohhran atangin Synod executive secretary (i/c Education) Rev Dr Rosiamliana Tochhawng leh Synod secretary (junior) Upa C Lalmuankima ruat an ni.
Mizoram sawrkar leh Mizoram Presbyterian Kohhran inremna angin, kum 2019 khan Sikulpuikawna Govt. Aizawl College dinna ram hi Mizoram Presbyterian Kohhran kuta hlan a ni a. Govt. Boys Primary School leh Govt. Boys Middle School, Sikulpuikawn chu school building leh a ram nen Mizoram Presbyterian Kohhran kuta hlan niin, Govt. Aizawl College building chu hemi ram hian a huam tel a ni.
Mizoram Presbyterian Kohhran hnena hlan fel thuai a nih theihnan hian hun tiam siam niin, a hma thei ang bera sawiho leh a, sawrkar leh kohhrana thuneitu sang zawk hnena thlen nise tih a ni.
Thutkhawmah hian H&TE department official-te bakah Mizoram Presbyterian Kohhran aiawhin Synod executive secretary (Sr) Rev VL Luaia Hranleh, Rev. Dr Rosiamliana Tochhawng leh Upa C Lalmuankima te an tel a ni.
Aizawl College building inhlan dan tur ngaihtuah
