Ruihhlo laka India ram a fihlim theihnana hmalakna – Nasha Mukt Bharat Abhiyaan (Drug Free India Campaign) Aizawl District hnuaiah veng/ khua hrang hrang 25 ah hma lak a ni dawn a. Hemi chungchang sawiho hian Zirtawpni khan bawrhsap Nazuk Kumar kaihhruaiin MHIP hruaitute nen thutkhawm a ni.
Bawrhsap chuan MHIP hruaitute chu anmahni phak tawk theuhah hmeichhiate zingah ruihhlo chungchang nasa lehzuala zirtirna pe a, ruihhlo dona kawnga theihtawp chhuah turin a sawm a. Aizawl district huamchhunga khua/veng 25 ah ‘Near Drug Free Village’ puang thei tura hma lakpuiah a sawm a ni.
Thutkhawmah hian Aizawl district huamchhunga hmeichhia /thalai leh naupang zinga ruihhlo hmansual hluar zel leh a venna kawnga hmalak dan tur sawiho a ni a. Mizoram Social Defence & Rehabilitation Board, Social Welfare & Tribal Affairs department-in naupang zinga zirchianna a lo neih tawh chu enho a ni. Zirchiannaa tarlan danin, ruihhlo titharte a kum telin an kum a naupang tial tial a, khawtlangah ruihhlo hmuh theih leh ban phak maia a tam ta hian hmeichhia /thalai leh naupang dinhmun tiderthawngin, ruihhlo hmansual kawngah a hip nasa deuh deuh nia hriat a ni.
Nasha Mukt Bharat Abhiyaan hnuaiah hian district tinah bawrhsap kaihhruaina hnuaia hma lak a ni a. Aizawl district-ah pawh kawng hrang hranga bei chho zelin, school/ college zirlai zingah, kohhran leh a bikin hmeichhiate zingah inzirtirna kalpui a ni.
Aizawl district veng/khua 25-ah ruihhlo do beihpui
