Aizawl district veng/khua 38 ah ruihhlo dotu din tawh

Sawrkar ngenna angin Aizawl district-a veng/ khua 38 ah ruihhlo do tur bik, Village – Local Level Task Force on Ruihho Do din a ni tawh.
Aizawl District Level Task Force on Ruihhlo Do hmalakna thlirletin Thawhtanni khan Social Welfare minister Er. Lalrinawma hoin thutkhawm a ni a. Hmalakna thenkhat tarlan zingah, Village – Local Level Task Force on Ruihho Do hi Aizawl district huamchhunga khua leh vengtinah din vek tura hriattir leh ngen a ni a, tunah hian veng/khua 38 ah din a ni tawh. Zirna in hrang hrang – school leh college ah te ruihhlo dona atana hma latu tur nodal officer inruat tura ngenna School Education leh Higher & Technical Education department ah siam a ni a. School Education department hian nodal officer 446 a ruat tawh. School leh college ah ruihho do awareness campaign neih tura ruahman a ni a, MSD&RB in district tina master trainer-te training a pek zawhah programme hi tan theih beisei a ni.
Committee hian August 1 hi Aizawl distrcit bik tan “Ruihhlo Do Ni” atan a lo ruahman tawh a, tun tum thutkhawmah hian he ni hman dan tur hi rel nghal a ni.
Minister chuan District Task Force-in ruihhlo dona kawnga hma tha tak an la chu lawmawm a tih thu sawiin mitin kan tanrual a pawimawh tih a sawi a. Ruihhlo do hi kan zavaia mawhphurhna a ni tih hre thar a, tan la sauh sauha thangtharte fuihtu ni turin a chah.