September ni 23, Thawhlehni khan Mizoram Premier League (MPL 12) khelh chhunzawm a ni a, table-a hmahruaitu Aizawl FC chuan table mawngphaha awm SYS FC chu 2-0 in an hneh. Aizwl FC hi tlawm nei lovin an kaltluang zel a, point sarihin hma an hruai fal der tawh.
MPL 12-a khel tha tluang tak, khelh riat chhung tlawm nei lova kal tluang tawh Aizawl FC hian season kal meka talbuai SYS an ngam viau a, hma takah goal thun tumin an nawr nasa hle. An khingpuite ngamin ball chang tam zawk ni bawk mah se chawlhlawk hmain goal an thun thei bik lova, goal awm lovin chawlhlawk an hmang.
Chawlhlawk hmain goal thun thei lo mah se chawlhlawk hnu lamah AFC in goal an thun ta thuai thung. Minute 58-naah Zomuansanga chuan AFC hmahruaina goal a thun. Hmahruaina goal an thun hnuin an khel tha chhunzawm viau a, player of the match a thlan zui tak C Zomuanpuia chuan minute 79-naah an goal hnihna a thun a, an hmahruaina a tizau. C Zomuanpuia goal thun hnu hian hun tawp thlengin goal a luh belh thei tawh lova, Aizawl FC chuan si hnih faia hnehna changin point thum an hmu zui ta a ni.
League (MPL) 12 chu Thawhtanni khan khelh a ni bawk a, Chanmari FC in hnehna an chan laiin Dinthar FC leh Kanan FC te an inhnehtawk ve thung.
Thawhtannia inkhel hmasa zawkah table-ah pahnihna luahtu Chanmari FC chuan an khingpui Mizoram Police FC chu 2-0 in an hneh. Chanmari FC tan hian Michael Lalbiaksanga chuan minute 19-naah hmahruaina goal a thun a, ‘Man of the match’ a thlan zui tak Aron Vanlalrinchhana chuan minute 40-naah an goal hnihna a thun zui leh a, chawlhlawk hmaa an goal hnih thun hi MPFC lakah an chakpui.
Thawhtanniah Chanmari FC an chak laiin Dinthar FC chu an veng thenawm Kanan FC lakah an chak zo lova, inkhel hmuhnawm takah 3-3 in an inhnehtawk.
Kanan FC hian Dinthar lakah bul an tan tha viau a, inkhel tan atanga minute hnihna lekah C Lalnunsanga chuan hmahruaina goal a thun nghal. Hma takah goal chhuah mah se Dinthar FC in an khingpuite an chhanglet thuai a, minute rukna lekah Lalhmingthanga Sailo chuan goal thunin an si phurh a sut.
1-1 a nih hnuin Kanan FC an che fuh hmasa leh a, J Lalbiakliana chuan minute 16-naah hma an hruai nawn lehna goal a thun. Hnufual zawkah tang nawn leh mah se Dinthar FC an buai lova, an khingpuite an chhang let leh thuai. DFC tan hian Laldanmawia chuan minute 28 leh 39-ahte goal a thun zawn a, 3-2 a hmahruai let chungin chawlhlawk an hmang.
Chawlhlawk hnu lamah inkhel a hmuhnawm zui viau a, Kanan FC chuan minute 66-naah goal thunin an si phurh a sut. Hun tawp thlengin goal a luh belh thei tawh lova, inkhel hmuhnawm tak chu 3-3 in a tawp ta a ni. Goal ruk luhna inkhel hmuhnawm takah hian Dinthar FC tana goal hnih thuntu Laldanmawia Ralte chu ‘play of the match’ ah thlan a ni.
MPL 12-ah hian Aizawl FC an khel tha tluang viau a, vawi kua khel tawhin tlawm an la nei lova, point 24 hmuin table chung ber an luah. Aizawl FC hian pahnihnaa awm mek Chanmari FC lakah point 7 in hma an hruai fal a, League champion nih an hnaih deuh deuh zel. Aizawl FC an khelh that tluan viau lai hian SYS FC erawh chu khelh 9 atanga point khat chiah la hmuin, an talbuai thui tawh viau thung a, khelh
Aizawl FC an chak leh ta
