Aizawl FC an chak lo nghal
Ocober 28, Inrinni khan India tualchhunga football club te inenla ian ber dawttu Indian I League 2023-24 khelh tan a ni a. Pathianni tlaia inkhelah champion hlui Aizawl FC chu Mohammedan SC hneh lovin an tlawm nghal.
I League-a Mizoram team neih chhun Aizawl FC hian Naihati Stadium-ah Mohammedan SC an hmachhawn a. Minute 12-na lekah goal thun bawk mah se an si phurh an sut zo thei lova, tlawm chungin season tharah bul an tan. Mualneitu Mohammedan SC hian Aizawl FC lakah bul an tan tha viau a, minute 7-na lekah Mizo tlangval Samuel Lalmuanpuia hmangin hmahruaina goal an thun.
Hma takah goal chhuah mah se AFC an buai lova, goal thunin an si phurh an sut thuai. Goal an chhuah atanga minute nga hnu lekah K. Lalrinfela chuan goal a thun a, an si phurh a sut. 1-1 a nih hnuin goal thun belh tumin an innawr tawn viau a, mualneitu an che fuh nawn leh. Minute 28-naah Alexis Gómez chuan hma an hruai nawn lehna goal a thun a, he goal hi an chakpui zui ta a ni.
Patianni a inkhel dangah Sreenidi Deccan chuan an mikhual NEROCA FC chu si li faiin an hneh a, Hyderabad club hi table-a hmahruaitu an ni nghal. I League 2023-24 a inkhel hmasa ber Inrinni ah Real Kashmir in an mikhual Rajasthan United chu si hnih faiin an hneh a. Hetihlai hian Gokulam Kerala FC leh an mikhual Inter Kashi te chu 2-2 in an inhnehtak ve thung.
I League season tharah hian team 13 ten inelna an hmachhawn. Team 13 zinga team kuate hi I League-a team awm sa an ni a. I League second division atanga team hnih; Delhi FC leh Shillong Lajong te an kai sang a. AIFF in team hnih; Inter Kashi leh Namdhari ten tel an dilna an pawmsak bawk. Season liam taa I League champion RoundGlass Punjab chu ISL-ah an kaisang ve thung. I League champion te ISL-ah an kaisan theih tak vangin I League champion nih tuma inelna boruak a lian thar hle.
Aizawl FC an chak lo nghal
