I League a Mizo team neih chhun Aizawl FC an che chhe chhunzawm a, pathianni tlaia an khingpui Churchil Brothers lakah si ruk fai ngawtin an tlawm. AFC hian table hnuai ber dawttu an luah nghet a, an dinhmun a derthawng leh zual.
Table chung lama awm mek Churchill Brothers hian chak mamawh Aizawl FC lakah bul an tan tha viau a, goal an thun hma hle. Inkhel tan atanga minute thumna lekah Wayde Lekay chuan hmahruaina goal a thun nghal. Hma takah goal an thun vangin mualneitu an phur viau a, inrintawkna sang zawk nen inlanin goal an thun belh leh har lo. An mualah phurna sang tak nena inlan Churchill Brothers tan hian Trijoy Dias chuan minute 27-naah an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Churchill Brothers an khel tha chhunzawm a, goal li ngawt an thun belh. Goal hmahruai thuntu Wayde Lekay chuan penalty atangin an goal thumna a thun a. Alassane Gassama-a’n minute 73-naah an goal lina a thun hnuin Trijoy Dias chuan minute 79-naah a mimal goal hnihna a thun belh zui ve leh bawk. Goal lu a han deuh hnu, hun tawp dawn tep minute 90+6-ah ah Pape Alassane Gassama chuan an goal rukna a thun belh zui leh a, an mualah 6-0 ngawtin hnehna an chang zui ta a ni.
An mualah awlsam taka an chak leh tak vangin Churchill Brothers hian khelh riat atanga point 16 hmuin table chung ber an luah kir leh a, an chunga awm zuai Inter Kashi chu point hnihin an lehpel. Table chung berah Churchill Brothers an kir leh rual hian Aizawl FC dinhmun erawh a chhe leh zual. AFC hian vawi riat khel tawhin point 6 an hmu a. An hnuai chiaha awm mek SC Bengaluru FC chu vawiin a an khingpui Shillong Lajong lakah an chak a nih chuan Aizawl FC hi table hnuai berah an awm ang.
Aizawl FC an tlawm
