I-Day football tournament 2023 khelh mek chu Ningani khan round hnihna khelh a ni a. Aizawl FC leh Chanmari FC ten hnehna an chang. Aizawl FC hian si thum faiin Electric Veng FC an sawp a. Chanmari FC in FC Venghnuai an lehthal ve thung.
Aizawl FC hian Electric Veng FC lakah bul an tan tha viau a, minute 15 chhungin goal hnih an thun hman der. Inkhel tan atanga minute 12-na lekah Lalrinzuala chuan AFC hmahruaina goal a thun. Hma hruaina goal an thun hnuah Aizawl FC an khel tha chhunzawm viau a, goal an thun belh leh thuai. Hmahruaina goal an thun atanga minute hnih hnu lekah Augustine Lalrochana chuan an goal hnihna thunin an hmahruaina a tizau a, si hnih faia hmahruai chungin chawlhlawk an hmang.
Chawlhlawk hnu lamah Aizawl FC an khel tha chhunzawm a, goal khat an thun belh leh. Electric Veng FC hian an si phurh sut tumin tan khawh thin mah se goal an thun thei lova, goal thun theihna hun tan an insiamchhuah tam thei lo bawk. Goal thun tuma an innawr tawn hnuin minute 61-naah F Lalramsanga chuan Aizawl FC goal thumna a thun a, an chakna nemnghet in, hnehna lian an chang zui ta a ni.
Aizawl FC in awlsam taka hnehna an chan hma hian inkhel hmuhnawm takah Chanmari FC chuan an khingpui FC Venghnuai a lehthal a, point thum hlu tak an hmu.
FC Venghnuai hian Chanmari lakah bul an tan tha a, goal hnih an thun hmasa. Minute rukna lekah Lalchhanchhuaha chuan hmahruaina goal a thun. He goal hian team a fuih phur viau a, hmuhnawm takin an inlan zui theih phah. Hmahruaina goal an thun atanga minute 20 a herchhuah rual chiahin FC Venghnuai hian goal an thun belh zui leh a, F. Lalchhanchhuaha chuan an goal hnihn thunin an hmahruaina a ti zau.
An goal hnihna an lawmna au thawm pawh a reh hmain Chanmari FC in goal an thun a, an si phurh an sut then nghal zat thung. Minute 26-naah vek Rohlupuoia chuan goal thunin an si phurh a sut then a, he goal hian chak beisei turin team a fuih phur nasa hle. Goal thun belh tumin innawr tawn viau mah se chawlhlawk hmain goal dang a luh belh thei tawh lo.
Chawlhlawk hnu lamah Chanmari FC an khel tha chhunzawm viau a, an si phurh sutna goal an thun thuai. Second half tan atanga minute hnihna lekah Lalpianthanga chuan penalty atanga goal thunin an si phurh a sut. An si phurh an sut zawh hnuin an khel tha chhunzawm viau a, minute 70-naah Khawpui-mawia chuan hma an hruai letna goal a thun a. 3-2 a an khingpuite lehthalin an chak zui ta a ni.
Aizawl FC leh Chanmari FC an chak
