Tuirial leh Kolasiba bawlhhlawh sawngbawlna siam tawh bak Aizawl chhehvel hmun thum dangah siam belh a ni dawn a, district headquarters tinah pawh hma lak mek a ni tih deputy chief minister Tawnluia chuan a sawi.
Hman khat daih sarang/ polythene (single use plastic – SUP), tawih mai thei lo leh leilung tichhetu, mihring leh nungcha chi hrang hrang tana nghawng tha lo thlentu tih rem tuma UD&PA department leh Mizoram Taxi Association (MTA) thawhhona hnuaia buatsaih, SUP thenfai leh hemi kawnga zirtirna hnatlang runpui chu Zirtawpni zing khan UD&PA changtu deputy CM hian Bethlehem Vengthlang Taxi Stand-ah a hawng.
SUP leh tawih thei mai lote tih rem tumin sawrkarin hma a la tih sawiin, sarang hman zawh hnu thehthang mai mai hian leilung tan harsatna siamin hriselna thlengin nghawng a neih avangin lakluh, zawrh leh hman kan do tlan a ngai tih a sawi a. Hnawm sakhat sawngbawlna Tuirial leh Kolasib-a kalpui bak Aizawl khawpui chhehvel hmun thum dangah siam belh tuma hmalak mek a nih thu leh District Hqrs-ah pawh hma lak mek a nih thu a sawi bawk.
MTA hnatlang runpui hi Aizawl khawpui chhunga taxi stand 78 bakah MTA Sub-Hqrs paruk – Lunglei, Kolasib, Serchhip, Mamit, Lawngtlai, Khawzawl leh branch pathum – Kawnpui, Lengpui, Thenzawl ten an huamchhungah theuhah an zawm a. Lirthei atanga bawlhhlawh paih chhuak lo tura inzirtirna, Garbage Free Mizoram sticker bel hnatlang, hman khat chauh daih sarang hmang lo tura inzirtirna banner tar leh taxi stand thenfai tea hma lak a ni.
Aizawl hnai hmun thum dangah hnawm sawngbawlna siam tum
