PMYVK Inter District Junior Boys Football Championship 2023-24 khelh mek chu January 22, Thawhtanni khan quarter-final khelh a ni a, 3-2 a Siaha DFA hnehin Aizawl DFA in semi-final an lut. Inkhel dangah Champhai DFA, Kolasib DFA leh Mamit DFA ten hnehna an chang bawk.
Inelna thlengtu Aizawl DFA hian 1st Bn, MAP Ground, Armed Vengah Siaha DFA an hmachhawn a, si an phurh hmasak zet hnuin hnehna an chang let a, phu takin semi-final an lut.
Aizawl hian inelna kal meka an chin than angin an khingpui lakah goal an chhuah hmasa leh. Inkhel tan atanga minute khatna lekah hand ball vangin penalty an chawi. He penalty hi Siaha tan Samuel J. Vabeimopha chuan Aizawl si nghak Hruaia Hauzel dan phak lohin a pet goal a, hmahruaina goal a thun. Hma takah goal chhuah mah se Aizawl huaisenna a lang nawn leh a, si an phurh hnuin an khel tha zual sauh. Na takin an khingpuite an nawr nghal chat a, mawi taka ball inpe kualin hlauhawm an siam fo a, ni dang ang bawkin goal thun an harsat leh. Siaha in counter attact atanga an hun tha neih an hloh hnuin Aizawl in goal an thun ta nge nge. Minute 27-naah Zodinpuia chuan hnaite atangin goal a thun a, an si phurh a sut.
Goal khat ve ve an thun hnuin Aizawl an khel tha chhunzawm a, Aizawl si nghak Huaia’n tih tur a nei meuh lo. Chawlhlawk dawn hnaih minute 45+1-ah forward tlan chak leh ball thiam Lalvohbika chuan mawi takin a pet goal a, hma an hruai letna goal a thun a, 2-1 a hmahruai chungin Aizawl in chawlhlawk an hmang.
Chawlhlawk hnu lamah Aizawl in game an thunun chhunzawm a, an khingpuite an nawr tawm zui zel. Goal thun belh theihna hun tha tak neiin defender Benjamin Lallawmawma’n penalty a hlawhhchuak. He penalty hi captain Vanlalpek-a’n a hlah a, an hmahruaina a tizau thei lo. Penaly thelh mah se Peka hian minute 79-naah chiang zeta pet goal in an goal thumna a thun zui tho thung.
3-1 hmahruai tawh Aizawl an thla a muang a, hun tawp dawn hnaihah an inthlakkual chiam a, si nghak Hruaia Hauzel pawh lakchhuah a ni. An inthlak kual chiam hi Aizawl in an tuar teuh hle a, hun tawp dawn hnaihah goal an chhuah. Minute 90+2-ah Bethel C Beirapathuathi chuan mawi zetin free kick a pet goal a, an goal hnihna a thun. He goal hian ngui leh chau tawh Siaha a kai harh thar a, goal thun belh ngei tumin an khingpuite an nawr chhunzawm. Hlauhawm siam bawk mah se goal an chhuah belh teuh hle zawk a, Aizawl in goal thun theihna hun tha an hlah. Goal luh belh lovin inkhel a tawp a, Aizawl DFA chuan 3-2 a hnehna changin semi-final an lut a, final luh an tumna kawngah Kolasib an hma-chhawn zui leh ang.
Aizawl DFA lakah fiahna hautak hmachhawn tur Kolasib DFA hian quarter-final-a an khingpui Khawzawl DFA chu hun pangngaiah 1-1 a an inhnehtawkpui hnuin penalty-ah 5-4 in hnehna chang.
Thawhtanni a inkhel Champhai DFA leh Lawng-tlai DFA te chu hun pangngaiah 1-1 in an inhnehtawk a, Penalty shoot-out ah Champhai in 7-6 in hnehna an chang a. Champhaiin semi-final a an hmachhawn tur Mamit DFA chuan quarter-final-a an khingpui Saitual DFA chu hun pangngaiah 1-1 an inhnehtawk hnuin penaltu-ah 5-4 in hnehna an chang.
Semi-final hi Nilainiah khelh a ni dawn a, RG Stadiumah khelh a ni ang.
Aizawl in semi-final an lut
