Setlak lui pump-na tur pipe siamthat mek chu zawh a nih hma chuan Aizawl khawpuiin tui hnianghnar a la nei thei dawn lo tih PHE minister Prof Lalnilawma chuan a sawi.
Assembly Session-a zawhna chhangin PHE minister chuan Aizawla tui supply tlahniam chu department pawhin a veiin a buaipui nasa a, tui khamkhawp neih theih loh chhan zingah Tlawng lui tui nu chu pakhat a ni, tiin, GAWSS Phase-I leh II in a theih ang zata tam a pump hian nikhatah tui litre maktaduai (MLD) 34 an pump thei a. Chutihlaiin Aizawl khawpuiin tui khamkhawp tura ni khata kan mamawh zat chu MLD 80 a ni tih a sawi. August-ah phei chuan tui nu avang hian tui an pump thei lo zing hle a, tui fim dan tehna – NTU 5 chin pump tlaka ngaih a nih laiin, August 28 zingah khan Tlawng tui hi NTU 885 a ni tih a sawi a ni.
GAWSS Phase-III Setlak lui tui lakna chu Vaivakawn -Zohnuai lei tlahniam avangin pipe kalna engemawzat thlak a ngai a, hei hi tunah buaipui tan niin, tluang taka thawh chuan ni 30 chhung vela zawh beisei a ni a, hemi zawh hma chuan Aizawl-in tui khamkhawp ala nei thei dawn lo tih a sawi a ni.
Aizawl-in tui ala hnianghnar dawn lo – PHE minister
