India rama a vawikhatna’n khawpui chhung step chhuk tak tak leh kawng bumboh tak taka chat zet zeta bicycle limthlaktir chiam ‘urban downhill event’ an tih thin chu Aizawlah huaihawt a ni dawn a, Red Bull nen tangkawpa buatsaih tur hi a hmingah Urban Downhill Mountain Biking Competition tih a ni dawn a, India rama a vawikhatna tur Mizoramin a thleng dawn a ni.
He sport rothap zet leh mi na zawng buaipui chi loh hi Hyundai Motor India nen thawkho chunga buatsaih a ni dawn a, khawlvel huapa mountain bike athlete (MTB athlete) langsar chinte pawh rawn tel ngei tura sawm an ni.
Aizawla pakhatna hian a talent phochhuahna hun khawvela Downhill Event lian ber Red Bull Cerro Abajo an tihah a nei thei dawn a ni.
He intihsiaknaa telte hi khawvel huapa lar MTB rider-te leh Red Bull athlete-te’n an enpui vek dawn bawk a ni.
Intihsiak hi thla thar October ni 24-a tan tur niin, he mi ni hian rider chhuakte chu kawng zim, chhuk leh bumboha lim nghal puat puat mai loin Red Bull athlete pahnih Tomas Slavik leh Pedro Burns-te’n thutchilhin kaihhruaina hun (mentorship session) an hmanpui phawt ang.
October ni 25-ah tlan-kawng hmunhma vel an han belchiang leh te te ang a, an bike (bicycle)-te endikin an tuaihnum leh te te dawn a; a tuk, October ni 26 chu qualifying round leh main race atan dah a ni.
Sports & Youth Services Department changtu minister Lalnghinglova Hmar chuan he event hi Mizoram tourism leh market lamte tan inphochhuahna hun remchang tak a nih thu sawiin, he event hian Mizoram hi sports leh adventure lama event buatsaihna atan a tihlar theih phah dawn a ni tiin, lawm takin a lo dawngsawng tih a sawi.
Hyundai Motor India Limited hnuaia Whole Time Director & Chief Operating Officer Tarun Garg pawhin an thawhhona chu Hyundai company-in adventure spirit a ngaihhlut leh tuipuizia pholangtu a nih thu sawi chungin Aizawl khawpui mawina leh khawpui chhunga kawng chhukte hmangtangkai zel chungin India ram pum huapa adventure lama tui mite hip theih an inbeisei tih a tarlang tel.
Aizawl kawng chhuk bir taka cycle khalh
