September ni 27 khan Aizawl leh Lamka inkarah helicopter a ‘service’ tan a, Aizawl atanga helicopter thlawk chho chu Lamka atangin Aizawlah a kir leh.
Helicopter a thlawk ta hi Manipur-a Zo hnahthlakte a lawm a, Lamka leh Kangpokpi inkarah te, Kangpokpi leh Dimapur inkarah te helicopter a thlawh thuai an beisei bawk.
Manipur-a Churachandpur district-a Zo hnahthlakte chu an buai hnuah Imphal-ah an kal thei ta lo a, Mizoram chu an hmunpui a ni rih. Delhi-ah pawh zin dawn se Aizawl kaltlang a ngai. Hei vang hian Lamka leh Aizawl inkara helicopter service hi an mamawh hle.
Zo hnahthlakte hruaitu pakhat chuan Aizawl hi an hmunpui a nih thu a sawi a, dam lo pawh Imphal-ah ni lovin Aizawlah hruai an ngaih tawh thu te, hliam tuarte rang taka Aizawl thlenpui an ngaih thin thu te a sawi.
“Kawng hrang hrangin Mizoram hi kan hmunpui a ni a, thil dang chu thuhran, hnam thilah Aizawl kal kan ngai reng a, chuvangin helicopter hi kan tangkaipui ang,” a ti.
Imphal an luh theih rih loh avangin Kangpokpi district nena an inkalpawh nan helicopter service an mamawh thu an hruaitute chuan an sawi a, hei hi Manipur sorkarin a bawhzui tha duh lo nia an hriat thu an sawi. Kangpokpi district-a mite tan Manipur pawna awlsam taka kal theihna tur an mamawh tih an sawi bawk.
Helicopter service hi ministry of home affairs remtihnaa tih a ni a, Manipur-a Zo hnahthlakte hian union home minister Amit Shah hnena an dilna bawhzuia tihhlawhtlin a ni. Global Vectra Helicopter Ltd te’n an buaipui a, Aizawlah hian Mualpui leh Lengpui-ahte a tum thin ang.
Aizawl leh Lamka inkarah helicopter thlawk ta
