June 17 kha Mosolman-ten inhlanna kut atana an hman – Idd-Uz-Zuha a ni a. Khawvel pumah he sakhaw betute chuan hmangin, ram pum huap chawlh a ni a, sawrkar pisa leh zir in pawh khar a ni.
Aizawlah chuan Joint YMA Field Vaivakawnah Aizawl Mosque imam (sakhaw hruaitu) Bilal Ahmed hoin hman a ni a. Mahni inhlan tharna ni a nih angin, inhuatna, itsikna leh dawt thu laka an fihlim theih nan an tawngtai rual a ni.
He hunah hian Aizawl Mosque Committee & Muslim Welfare Society Mizoram general secretary Md. Mamon Majumdar chuan an sakhaw lehkhabu thianghlim Quran-in Mosolman-te chu an awmna hmun apiangah ram dan zah leh bawhchhe lo tura a tih angin, Mizorama hna thawk tura rawn kalte chu danin a phut angin, inner line permit damlai ngei nei reng turin a chah a. ILP neih loh avanga man tawk an awm thin chu zahthlak an tih thu a sawi. Tualchhung mite dan leh khawsak phung zahthiam a, chenpui nuam ni theuh tur leh Central YMA leh an awmna YMA Branch te mit tikham zawka awm lo turin a chah bawk.
Tunhnaia Mizoramin ruahsur leh thlipui avanga chhiatna a tuar chu Muslim Welfare Society Mizoram chuan pawi a tiin, a tuartu chhungte a tawrhpui a, nunna chan mi 34-te tan an tawngtai sak tih a sawi. He chhiatna chhawmdawl hna thawh mekah CM Relief Fund ah sumfai an chhunglut ve dawn tih a sawi a ni.
Idd hman theihna tura hmunhma hmantirtu, a bulhnaia cheng, Police leh Traffic Police lamte chungah an lawm tih a sawi bawk.
Aizawl Muslim-ten Idd hmang
