Aizawl District Bharat Scouts & Guides buatsaih Eco- Friendly Grand Campfire chu Ningani khan Central YMA Hall Tuikhuahtlangah Art & Culture minister C Lalsawivunga’n a hawng.
Minister chuan Scouts & Guides-in Eco- Friendly Grand Campfire an buatsaih chu thil lawmawm tak a ni, tiin, Scouts & Guides chu khawvela pawl lian ber, mi maktaduai 33 vel awmna pawl ropui tak a ni tih a sawi. “He movement-a dan leh thutiam hi zawm vek ila, jail pawhin luahtu a nei lo thei hial ang. Nungchang tha inzirna hmun leh khawhawi zauna remchang tak a ni,” a ti.
Scouts & Guides danin a phut angin khua leh tui tha ni a, mi rintlak, rinawm, aia upa zahthiam, thudika huaisen ngam, inren thiam niin, ngaihtuahna thianghlim se, he movement kaltlang hian ram leh hnam siamthat hna thawk tlang ang u, tiin a sawi.
Scouts & Guides state chief commissioner, Sports & Youth Services director Lalnunhlua’n thu a sawi bawk.
Tunah Aizawl district-ah Scouts/Guides 1143 leh Unit leader 72 an awm a. Tritya Sopan 345 leh Rajya Puraskar 154 an awm.
Aizawl Scouts & Guides Grand Campfire hmang
