Aizawl ti-Aizawltu a la cham

Aizawla cheng i nih chuan i hria ang; a hming i hre lo a nih pawhin a hmel tal chu i hria ang – i hmu fo ang. Khaw danga cheng i nih pawhin, Aizawl i kal changin i hmu ve tho ang.
C Rothangpuia a ni a, tingtang a nei – a perh thin – a zai thin bawk. Aizawl khawlaiah i hmu thin ang; tunlai huna Aizawl ti-Aizawltu pakhat a tling.
|ingtang perh thiam tak a ni lo mai thei a, zaithiam hlerh hlerh pawh a ni kher lo ang. Mahse Aizawl khawlaia a tingtang nena a che vel hi mi tam tak mitthlaah a cham a, a rei telh telh ang a, a thlalakte pawh hi a hlu telh telh ang.
1956-a piang C Rothangpuia hian December ni 12 khan khawvel a chhuahsan a, tlaivarpui niin, a tukah thlahliam a ni. A chanchin hi mipuiin an inhrilh chhawng a, social media lamah pawh amah ui thu leh thlahna thu te a lang. Sap tawng chanchinbu lamah pawh a lang zui bawk. Amah awm tawh lo mah se a hming leh a chanchin chu a la cham!
“Kan rin aiin miin an lo hria a, mi hian an lo ui a, a mak kan ti a. Kan beisei phak lo hetiang hi,” a nau fapa Ramchhuana chuan a ti.
“Miin hetiang takin an lo hria ang tih hi kan ngaihtuah pha lo tak tak a. Facebook-ah te khan a boral thu an post a, an comment-te ka chhiar a, ui takin an thlah a. Khatiang taka an ui leh an duhsak kha kan lawm tak zet a ni,” a ti bawk.
Rimawi lam hi a tuina a ni a, tun hma pawhin radio a ngaithla nasa thin. |ingtang a nei a, radio-a a zai ngaihthlak a lo rem thin bakah, tingtang perhin a zai a zai thin. Hun rei tawh takah khan tingtang leina tur sum tuakin thing a phur thin a, chu chu a tingtang neih dan a ni.
Mi thawm zawi, mi inthlahrung a ni a, chhungte leh thenrualte lakah pawh inthlahrung tlat chi a ni. A naute in bulah a parawl a, a chhungte’n chaw eia an sawm pawhin, hun remchangah chawhmeh a pe leh thlap thin. ‘A ngai lo e,’ tih theih a ni lo.
A parawl a, nilengin hmun lun laiah a tingtang hmangin hna a thawk thin. Aizawla street musician hmasa pawl tak a ni a, a daih rei ber a ni hial ang. A hna a thawh tan hun hi hriat a har a, 2006 hma lamah bul a tan tawh tih chu a chiang.
Thawh hreh nei lo, intodelh tum tlat mai a ni a, chhungte tana ui nei lo, dam lo an awm chang pawha ui hauh lova damdawi man tur pe thin a ni.
November thla tir lamah a insawisel tan a, theihtawp chhuaha enkawl a ni. Mahse a chau telh telh a, December ni 12-ah a chawl ta a ni. Mi thawm zawi tak ni mah se mi rilruah a la cham chiang e.
“Van mipui zingah mawi takin i tingtang nen Lalpa fak la aw,” tiin facebook-a amah thlahtu pakhat chuan a thlah a, “Ehee, a van mak ve, kal chhuah changa hmuh tur a lo awm kha a tikim asin le, muangin chawl mawlh rawh se,” ti te, “Pa ang chhungah muang te’n chawl rawh se, bazar vela a zai hmel hmuh tur a awm tawh lo tur chu va lunglen thlak dawn em,” ti te, “A guitar hrui kim lo nena a lo thu ve ringawt pawh kha a hmuhnawm asin le, a ngaihawm dawn em mai,” ti te an awm.