Chief minister Lalduhoma chuan Aizawl khawpui a tawt tawh avangin khawpui thar – Thenzawl-Peace City din an duh tih sawrkar laipui hotute hnenah thlenin hemi atan hian hma lakpui turin a ngen. New Delhi-ah Prime minister Narendra Modi kaihhruaiin NITI Aayog Governing Council vawi 10-na chu Inrinni khan an thu a. Mizoram chief minister Lalduhoma chuan he council-ah hian thu a sawi. Mizoram mipui zatve aia tam khawpuiah kan cheng a. Khawpuia cheng zaa 80 chu Aizawla cheng an nih avangin a tawt hle tih a sawi.
“Kan thalaite hi primary sector atanga industry leh service sector lama tam zawka an luhna tur dap a ngai a. Hemi kawnga kan mutan khengthla turin khawpui thar, mipui nuai 10- 15 vel khawsakna tur Thenzawl-Peace City din kan duh. Ministry of Housing & Urban Affairs chuan min thawhpui (support) tha a, an chungah kan lawm hle,” a ti.
Tunhnai lawkah Mizoram chu fully literate state-a puan a ni a. Hei hian Mizoram chu chhawrtlak mihring (human capital) lama a inbuatsaih nasat zia leh a hlawkpui zia a tilang tih chief minister hian a sawi a. Mizoram unemployment rate chu 2.2% niin, workforce-a hmeichhe inrawlhna chu zaa 45 a ni tih a sawi bawk.
“Skill lamah kan duai lo hle a. Khawvel huap inelnaah India aiawh thei khawpa tha kan nei,” a ti.
NITI Aayog State Support Missions kaltlangin hmalakna chak takin an kalpui a. Viksit Bharat 2047 thlen theihnan sawrkar department tin chu an ruahmanna (action plan) an thehluhtir a, an mamawh an hriatsak bawk, tiin, “Heng behchhan hian ‘vision document’ kan buatsaih mek a. Reiloteah NITI Aayog-ah thehluh a ni ang,” a ti.
Viksit Bharat 2047 atana hmalakna langsar tak chu Bana Kaih Scheme a ni tih chief minister hian a sawi a. Ram hmasawnna atana thawhpui tlak (progress) partner-te chu collateral free loan cheng nuai 50 thleng an pe thei a, an thawh that dan azira interest zaa za a thlawna tih sak an tum tih a sawi. ‘Tunah hian chutiang thawhpui chu a thawh khatna atan mi 517 kan thlang fel tawh. Central scheme nena kaldun zel tura duan a ni,” a ti.
Chief minister thusawi dang:
8 Operation Sindoor hlawhtling taka neih a nih avangin Prime minister lawmpuina a hlan a. Mizoram mipuiin an thlawp tlat tih a sawi.
8 Loneitute tan market support system tha tak an kalpui a. Entrepreneur-te tan hmalakna tur remchang leh hamthatna an siam a, innovator-te tan grassroot competition buatsaihin, competition hmasa ber atangin mi 40 chu grassroot innovators-ah an puang tih a sawi.
8 Infiamna lamah Mizo thalaiten theihna sang tak an nei tih an hriat avangin naupang talent nei zawnchhuah a, chher puitlinna tur – Empowering Mizoram Sports an kalpui mek tih a sawi.
8 Investment Policy tunlai leh tha zawk an siam thar a, Industrial Training Institute chu industry liante nen inthlunzawm chungin an thuam tha mek a. Hemi kawngah hian NITI Aayog leh Ministry of Skills & Entreprenuership Development ten thawhpui tur industry tha tak tak dappui se a lawmawm hle dawn tih a sawi.
8 Prime minister Narendra Modi kaihhruaina hnuaiah NITI Aayog tanpuina hmu zel chungin Mizoram hi ram changkangah an siam ngei dawn tih a sawi a ni.
Aizawl tih zangkhaina atan Thenzawlah khawpui thar din kan duh – Chief minister
