March 19, Nilaini khan MFA Inter District Junior Boys Football championship 2024-2025 chu Serchhip-ah khelh tan a ni a, Aizawl District Under 15 te Saitual U – 15 hneh lovin an tlawm nghal.
MFA Inter District Junior Boys Football championship 2024-2025 a inkhel hmasa berah inelna hnuhnung bera pahnihna Kolasib DFA in bul an tan tha a, an khingpui Siaha DFA chu 3-0 in an hneh nghal. Kolasib U-15 tan hian an player pawimawh Lalrinhlua chuan minute 30-nah hmahruaina goal thuin, inelna neih meka goal thun hmasa ber a ni a. Minute 54-naah Omega Lalawmpuia Ralte in an goal hnihna a thun hnuin Hlutea hian minute 68-naah an goal hnihna a thun zui leh a. Champion tura rinkai Kolasib DFA te hian 3-0 a hnehna changin point thum hmu hmasa ber an ni.
Kolasib an chak lai hian champion lai Champhai DFA in inelna thlengtu Serchhip DFA lakah tlawm an pumpelh thei hram a, inkhel hmuhnawm takah 3-3 in an inhnehtawk.
Inelna thlengtu Serchhip U-15 team hian champion lai Champhai lakah bul an tan tha lova goal chhuah hmasa zawkah an tang. Champhai tan hian R Zonunfela chuan minute 17-naah hmahruaina goal a thun. Si phur hmasa zawkah tang mah se Serchhip in an mikhualte an nawr na viau a, goal thum ngawt an thun zawn. Serchhip tan hian Lalthafamkima chuan minute 25-naah goal thunin an si phurh a sut a. An si phurh an sut hnuin Lalpeksanga Chhangte chuan goal hnih a thun zawn a, Serchhip in 3-1 in hma an hruai let a, champion lai lakah an chak teuh hle.
Hnufual zawk an nih reng hnuin Champhai in a tawp an khar tha ve thung. Champhai tan hian Thawmsangliana chuan minute 63-naah goal thunin an si phurh a sut then. Hun pangngaiah an si phurh an sut zawh theih loh hnuin R . Lalhruaitluanga chuan hun pek belh minute 70+3-ah goal pawimawh tak a thun a, an si phurh a sut zo va. Serchhip leh Champhai te hian point khat ve ve an hmu zui ta a ni.
Kolasib leh Champhaiin an match hmasa berah point an hlawhchhuah laiin District lian Aizawl erawh chu Saitual DFA hneh lovin an tlawm ve thung. Inelna hnuhnung berah semi-finalist Aizawl DFA hian Saitual lakah beisei angin bul an tan tha tawk lo. He inkhelah hian goal lut a awm theih loh reng hnuin Saitual tan Victor Lalawmpuia chuan minute 59-naah hnai tak atangin a pet goal a, chakna goal pawimawh tak thunin, point thum hlu tak an hmu zui ta a ni.
Nilainia inkhel dangah Lunglei DFA leh Lawngtlai DFA te goal awm lovin an inhnehtawk ve bawk.
MFA Inter District Junior Boys Football championship 2024-2025-ah hian champion tumin district 11 an inlan a. Team 11 te hi group hnih; A & B-ah then an ni a. Group khat a mite vawi khat theuh an inkhel ang a, point hmuh sang pahnihin semi-final an lut ang.
Aizawl U 15 an chak lo
