Aizawla pengthuam siam dan turah PWD-in rawtna an thlen

Aizawla pengthuam siam dan
turah PWD-in rawtna an thlen
PWD minister Vanlalhlana hoin an department hotute chuan Thawhlehni khan chief minister Lalduhoma hnenah Aizawl khawpui chhung kawngpui pengthuam thenkhat siam dan turah rawtna an thlen.
Sawrkar hmasa lamah Aizawl pengthuam pawimawh siam tumna awm tawh thin mah se, a man a sangin a liantham deuh thin tih PWD minister chuan a sawi a. Tuna an ruahman hi chu sum seng tam lutuk loa pengthuam pawimawh pathum siamthat tumna a ni tih a sawi.
Hmun thum – Bawngkawn pengthuamah hmun hnih leh Vaivakawn pengthuam siam dan tur rawtna an entir a. Ruahman dan chuan, State Guest House thlanga Chaltlang Road hnuaiah Ramhlun main road leh Ramhlun lower road tunnel siam a, lei hnuaia inzawm tir a, Bawngkawn Police Station bulah national highway zawmtir a ni.
Ramhlun atanga NH lama kal duh tan leh NH atanga Ramhlun main road leh lower road-a kal tur tan tuna traffic point thleng kher loa kaltir theih chu he ruahmanna in a tum a ni a, lirthei lian erawh an kal thei loang. He project hi cheng vaibelchhe 25-a thawh theih nia ngaih a ni.
Ruahmanna dang leh chu, Bawngkawn Hrangbana Filling Station thlang, tipper dinna atanga (viaduct) lei, Brigade Veng lama dawhkai a ni. Serchhip Bypass road, Sailiamkawn bula an dawh lei ang chu he hmunah hian metre 49 vela sang, metre 150-a sei a dawh theih niin an ngai. Lei dawh awlsam leh man tlawm a ni. Brigade Veng lamah hian Greenwood Hospital bul pengthuam velah a chhuak phei ang. He hna hi vbch. 30 vela thawh theih tura ngaih a ni.
Bawngkawn pengthuam hi Aizawl khawpui chhunga pengthuam lun ber a ni a. Chawhrualin nitin lirthei 50000 chuangin an paltlang thin.
Ruahman pathumna chu Vaivakawn pengthuam siam a ni a. Vaivakawn junction hi tuna Vaivakawn Bazar sak tur nen kalkawp tir a ngai a. Cultural Centre bulhnai atanga YMA ground sir deuh chunga lei, Bazar atana hman theih nghal tur dawh phei a, Vaivakawn Bazar-a innghahtir a ni. Vbch. 40 vela sak theih beisei a ni. Vaivakawn pengthuam hi chawhrualin nitin lirthei 30000 chuangin an paltlang thin.
Heng ruahmanna hi duan hi eng sum atangin nge thawh a nih ang, tih la ngaihtuah chawp tur a ni a. Tuna chief minister an sawipuinaah hian a thawhna tur sum hnar sawi a ni rih loa, a sum dap dan erawh a thuphungin sawi tel a ni.