Aizawl khawpuiah four wheeler leh two wheeler taxi 3000 chuang ve ve awm atangin MizoTaxi app hman tuma inziaklut chu 1500 chuang hret an ni a; auto rickshaw service 400 vel atangin app hmang tura inziaklut 24 vel an awm bawk.Mizoram State Transport Authority chuan taxi rate felfai zawka kalpui a, taxi hmangtute leh a khalhtute tan pawha kawng hrang hranga him leh tangkai zawka hman theih a nih an rin avangin Digiride Technology Pvt. Ltd. NIT(Mizoram) nen tangdunin MizoTaxi application hi siam a ni tih an lo sawi tawh a. He app hmang tur hian a tirah inziahluh man Rs.600 tih a ni a, inziahluh theih hun hi June 2026 chhung an ti a ni.
Taxi khalhtu intelkhawm lamin hetianga barhluih an ni hi an duh loh thu sawiin, an dodal a, hemi hnua thuneitu lam nen an inbiak hnu ah inziahluh man hi Rs,.500 tih niin, inziahluh theih hun pawh July 31 thleng pawhsei a ni. Transport department lam chuan August-ah hian la pawhsei leh tur a ni em tih an sawilawk thei lo tih an sawi.
STA ruahman ang bawkin, MizoTaxi app-a inziaklut taxi-te chu a enchhinna atan July 10 atanga August 10 chhung nitin service phalsak an ni tih SP Traffic Aizawl chuan hriattirna a lo tichhuak tawh a. Hemi chhung hian inziaklut tawhte chu taxi tlan loh ni awmsa in a huam ve loa, an taxi hnung leh hmaah STA-in MizoTaxi app sticker a pek chu tar tir an ni. Enchhin chhunga inziaklut tharte pawh taxi tlan loh ni hian a huam lo ve nghal a, nitin tlan tir an ni dawn tih a sawi bawk.
The Aizawl Post-a tarlan tawh angin, Mizoram Taxi Association leh Aizawl Two Wheeler Taxi Association chuan an hnuaia member ni leh member ni ve chiah lo pawh, service theih hrim hrim 3000 chuang ve ve niin an lo chhut tawh a. Aizawl leh a chhehvela autorickshaw service hi 420 vel nia ngaih a ni bawk.
July 31 thleng khan MizoTaxi app hman tuma taxi inziaklut hi four wheeler ah 391, two wheeler-ah 1134, autorickshaw-ah 24, an vaiin 1549 an ni a. Hemi thleng tho hian mipui lamah MizoTaxi app hman tuma mobile phone-a he app download/ install tu mi 22000 chuang awmin, July thla chhung khan MizoTaxi app book-tu mi 5144 an awm.
Hetihlai hian July 30 khan Transport department leh SP Aizawl Traffic office tangdun chuan MizoTaxi app hnuaia lirthei inziaklut khalhtute tan R Dengthuama Hall Mualpui Salem Vengah training an buatsaih a. DA pek an nih tur thu sawilawk a ni. Thudawn danin hemi tum hian two wheeler taxi 300 vel, four wheeler taxi 90 vel leh autorickshaw tlem an kal a, DA Rs. 200 pek an ni tih sawi a ni.
Aizawla taxi service 6000 chuang atangin MizoTaxi app-a inziaklut taxi 1500 chuang
