Aizawla YMA branch tinin
ruihhlo do rawn tan dawn
Aizawl khawpui chhunga YMA branch tin telna turin Aizawl chu zine 10-ah then a ni a, hetah hian branch tin aiawhin zone chan an insem dawn.
January 23 zan khan YMA Kumpuan “Ruihhlo Do” chungchanga hmalak dan turah Central YMA buatsaihin Aizawl khawpui chhunga Branch office bearers an inrawnkhawm a. Thupui sawihawngtu Central YMA vice president Prof. Lalnuntluanga chuan, ruihhlo avanga kan thalai tam tak nunna chân ta te leh tuna ruihhloin a bawhbuai mek avangte, kan thalai ruihhlo la ti velo venhimna atan ruihhlo do hi YMA chuan kan tih makmawh, kan koa tla a ni, tiin a sawi.
Inrawnkhawmnaa tel ho rawtna hrang hrang ngaihthlak a ni a, hetiang hian hmalakna tur khaikhawm a ni. Ruihhlo dona atan Aizawl khawpui chhunga branch 111 chu zone 10-a then a ni anga, zone huamchhunga branch atangin Zone CADS member tur mi pathum theuh ruat tur a ni. Zone thenfel / siamfel leh zone hruaitu ruat chu Central YMA hruaituten ruahmanna an siam anga, zone hrang hrang hmalak tan hun pawh Central YMA-in ruahmanna a siam ang.
Central YMA president R Lalngheta chuan ruihhlo do kawngah YMA Branch-te pheikhai rual taka kal a tul tih a sawi a. Fimkhur tak leh huai taka kal a ngai dawn a, ruihhloa sumdawngte pawh pal an ngaih chuan pal a tul dawn tih a sawi a ni.
He hunah hian kum 2025 YMA Inkhawmpui Lian rorel zinga pakhat “YMA nihphung inhrilhtharna hun hman thin nise,” tih bawhzuina atan YMA nihphung inhrilhtharna hun hman ani a. Central YMA treasurer Er H Duhkima’n hun a hmang. “YMA chu Pathianin Mizo hnam phuarkhawm tur leh Kristianna leh Zonun zemawi vawnghim tlat tura min pek a nih avangin Mizoram leh hnam hmangaihtute kan ni a, YMA tello chuan Mizoram dinhmun tur hi ngaihtuah ngam pawh a ni lo, tiin a sawi a ni.
Inrawnkhawmnaah hian branch 111 atanga aiawh kalkhawm, CEC member-te leh Central YMA OB an tel a ni.
Aizawla YMA branch tinin ruihhlo do rawn tan dawn
