Employees’ State Insurance chhawrtu hnathawktu mi 2634 Aizawlah an awm a. Kum 2022- 2023 bikah mi 1960 an inziaklut thar. Mizoramah chuan Aizawl Municipal huamchhungah chauh la kalpui a ni.
Ministry of Labour & Employment hnuaia Employees’ State Insurance (ESI) Act chu Mizoramah chak zawka kalpui a nih theih nan State Insurance Corporation Regional Board Mizoram chu Thawhlehni khan an thukhawm a. Employees’ State Insurance Corporation (ESIC) hi Aizawlah kalpui niin, India ram pumah ESIC hian hospital 161, dispensary 1574, medical college 13 a thawhpui mek a; insured person (IP) fate tan ESIC medical college 6-ah seat reservation a awm a ni.
Labour, Employment, Skill Development and Entrepreneurship minister Lalnghinglova Hmar chuan ESIC hnuaia private institution-a thawktute tan hamthatna ruahman chu a taka hmang tangkaitu nih tum turin a chah a. ESIC hnuaia kan mi chhawrte tan hamthatna awm thei, dam lo inenkawlna, hnathawhnaa inhliam palh avanga chhawmdawlna, vanduaina avanga ram tuilei loa awmte tanpuina thleng a huam avangin hnathawktute leh a chhawrtute tan a pawimawh tih a sawi a ni.
ESIC regional director (NER) Robert Guite leh East and North East Zone medical commissioner Dr Richita Biswas chuan Mizorama kalpui tawh dan leh hmachhawp an sawi a. Report danin, ESI Act hi Aizawl Municipality huamchhungah 2015 December 1 atang khan kalpui tan a ni a. Branch office hi RZ Annex building, Zodin Square Tuikual South-ah an nei a ni. ESI Dispensary pawh Zaluta building, Venghluiah an hawng bawk. Dispensary hian Aizawla damdawi in 4 leh Diagnostic Centre/ laboratory pahnih a thlunzawm a ni.
ESI scheme hian sumdawnna (road transport, hotels & restaurants, cinemas, newspaper, shop, educational /medical institution adt) eng pawha thawktu 10 leh a aia tam awmna a huam vek a. Thla khata Rs. 21000 aia tlem hlawh tan he hamthatna hi dawn theih a ni.
ESI Act hnuaia hamthatna chang tur hian inziahluh hnu ah hnathawktuin a hlawh atanga zaa 0.75 leh a chhawrtuin zaa 3.25 thlatin an chhunluh a ngai a ni.
Thutkhawmah hian Mizoram Private School Owners Association, Mizoram Non-Government Hospital Association, Automobile Workshop Owners Association, NTUM, FOTUM, CITUM leh LESDE department hotute an tel a ni.
Aizawlah Employees’ State Insurance chhawrtu 2634
