Aizawlah ex-Servicemen rally nei
Indian Armed Forces, Mizoram sawrkar leh Mizoram Ex-Servicemen League (MESL) tangho chuan Inrinni khan Aizawl Lammualah State Level Ex-Servicemen Rally neih a ni.
Hmanpuitu larsap Gen Vijay Kumar Singh (Retd) chuan, ram tana ex-Servicemen ho huaisenna, inthununna leh hnaa inpekna chu entawntlak a ni, tih a sawi a. Mizoram Ex-Servicemen League member-te chu India rama ex-Servicemen a hmuh tawhte zinga inchei nalh leh zahawm ber an ni tih a sawi a. Mizo mipui leh sipai inkarah muanna, remna leh inzahtawnna a awm, tiin, mipui leh sipaiten inlaichinna tha tak an neih a, he rally pawh hi inzahtawnna, inrinngamna, thawhhona leh induhsaktawnna lantirna a ni tih a sawi a ni.
Ex-Servicemen-te nunah mahni inphatna leh inpumpekna entirna a taka hmuh theihin a awm tih a sawi a. An service chhungin chhungkaw bulah pawh awm loin India ram hmun hrehawm tak takah an awm kual a, anmahni vangin kan him thin a. An that lai hun tam zawk ram tana hlantu ex-Servicemen leh an chhungte puala Medical camp buatsaih a ni leh pension, hamthatna leh chhawmdawlna an dawn chungchanga vuivaina thlenna tur Grievance Redressal Cell siam a ni chu a lawmawm, tiin a sawi. Mizoram sawrkarin ex-Servicemen leh an chhungte hamthatna a ngaipawimawh a, Zo nun zemawi ‘tlawmngaihna’ chawinungin ex-Servicemen-te zaha tawiawm zel a tul tih a sawi bawk.
Hmanpuitu dang Home minister K Sapdanga chuan, ram tana inhlante leh ram zahawma min siamtu ex-Servicemen-te puala rally neih a ni chu ropui a tih thu a sawi a. Anmahni avangin India chuan beiseina sang tak a nei tih sawiin, ram tana an thatlai hun tam zawk hmanga ram ralti leh hrehawm tak taka awm thinte ngaihsanawm a tih thu a sawi. Mizoram mipuiin ex-Servicemen te inpekna an hrereng dawn tih sawiin, khua leh tui entawntlak nih chhunzawm zel a, thalaite fuih phurtu leh entawn ni zel turin a chah.
He hunah hian Assam Rifles (East) inspector general Maj Gen Inderjit Singh Bhinder chuan inlawmna thu a sawi a. 3 Corps corps commander Lt Gen Abhijit S Pendharkar bakah Mizoram Ex-Servicemen League president Lt Col Clement Lalhmingthanga (Retd), MLA leh Sainik Welfare and Resettlement director Surg Lt Cdr Lalnunluanga ten thu an sawi a ni.
Ex-Servicemen leh a chhungte mi 500 vel an tel a. Medical camp neih a ni a, ex-Servicemen leh an chhungten harsatna an neih hrang hrang lo ngaithlaa hma laksaktu tur dah an nih bakah banking leh CSD stall pawh hawn a ni a. Army Recruiting Office (ARO) leh National Cadet Corps te an inphochhuak bawk.
Ex-servicement 8 hnenah chawimawina hlan a ni a, an zingah hian Padma Shree Hav Lalbiakthanga Pachuau a tel. Ex-servicement 3 hnenah chhawmdawlna hlan niin, ram tana nun hlantu sipai thi ta kalsan tak nupui 5 hnenah chawimawina – Veer Nari hlan an ni.
Aizawlah ex-Servicemen rally nei
