UD&PA, Aizawl Smart City Ltd, Aizawl Municipal Corporation leh Central YMA tangho chuan Inrinni zing khan Aizawl khawpui faina atana Coordination Committee buatsaihin Faina Hnatlangpui 2026 an nei a. Lammual leh a chhehvel thenfai a nih bakah Aizawl khawpui chhung YMA branch tam zawk an branch huamchhungah an hnatlang.
Hnatlangpui tan hma in Vanapa Kall kawtah UD&PA commissioner & secretary Lalmalsawma Pachuau chuan Aizawl City YMA Branch Fai Intihsiak 2026 nen a khuhhawng kawp a. Hemi hnu hian tlawmngai pawl thenkhat leh sawrkar department ruat bikten Lammual leh a chhehvel an tifai a, Aizawl khawpui YMA branch tam zawkin remchan dan angin mahni veng theuhah faina hnatlangpui hi an zawm a, chhiat tawhna avang leh rokhawlhna dang avanga YMA branch hnatlang thei lo an awm bakah a hma ni lama lo hnatlang tawh an awm bawk.
Faina Hnatlangpui pual hian bawlhhlawh tamna leh hmun bal zual lai 15 thlanchhuah niin, a hnaivaia awm YMA branch-ten heng hmun tihfai hna hi an thawk nghal a, khua in a zir loh avangin hnatlangpui hi hmun tam takah a khaihlak a ni.
Hnatlangpui hi Comprehensive Plan for Municipal Solid Waste Management in Aizawl tihhlawhtlinna tur pakhat a nih bakah Aizawl khawpui hi India rama khawpui fai ber leh bawlhhlawh awmlohna – ‘Garbage Free Aizawl’ a nih theihna tura hmalakna zing ami a ni.
Coordination Committee chuan Faina Hnatlangpuia tlawmngai pawl hrang hrang thawkchhuakte chungah lawmthu sawiin, faina kawnga hmalakna hrang hrangah theihtawp chhuah chhunzawm zel turin a ngen a. YMA Branch tin chu Aizawl City YMA Branch Fai Intihsiakna 2026-a fai lawmman la thei khawpa tan la thar theuh turin a ngen tih a sawi a ni.
Aizawlah Fai Hnatlangpui nei
