Mizoram Florists’ Association (MFA) chuan Aijal Club Park-ah Thawhlehni khan Florists’ Fair an nei tan.
Fair hawngtu MJA Gen.Hqrs president C Lalrambuatsaiha khawvel thil mawi ngaihtuah apiangin rilruah pangpar a lang thin tih sawiin, “Kan ngaihzawng, kan duh takte pawh pangpar mawi tak nen tehkhin a ni thin a. Ram mawi leh ram hmuhnawm reng reng hi pangpar mawi tak tak vulna a ni zel. Khawvel ram changkang leh hmasawn tawhte hian pangpar an ngaihlu thin hle a. Pangpar hi tourist hipna atan a tha a, tourist industry mai ni tawh loin, industry pakhat a ni tawh,” a ti.
Mizoramah pawh pangpar man a to avangin eizawnna tling tak a ni tawh tih a sawi a. Khawvela pangpar mawi ber ber chawlut a, kan ram tipar vul mawi zel turin duhsakna a hlan tih a sawi a ni.
Florists’ Fair-ah hian dawr 70 vel hawn niin, pangpar potted, pangpar tiak, pot, leitha, thlai tiak, pangpar tiak leh pangpar kaihhnawih chi hrang hrang zawrh a ni a, October 13 thleng neih a ni ang.
Mizoram Florists’ Association hi November 1997-ah a ding tan a, tunah hian headquarters-ah member 500 chuang awmin, khaw hrang hrangah branch 27 an nei. Kum 1999 atangin flower show leh fair an buatsaih a, kumtin an buatsaih a, a chang chuan kum khatah vawi khat aia tam buatsaih tum an nei.
Aizawlah Florists’ Fair nei
