Aizawlah NIELIT Job Fair
NIELIT (National Institute of Electronics and Information Technology) Aizawl chuan Zirtawpni khan MC Rooftop-ah Job Fair 2026 a buatsaih a. Hna zawng 300 vel leh a latu company 14 an tel.
Hmanpuitu Labour, Employment, Skill Development & Entrepreneurship secretary Dr Lalhriatzuali Ralte chuan, kan ram ngeiah electronics leh IT zirna NIELIT Centre kan nei chu a lawmawm a; kan ram leh thalaiten an mamawh hnalak runpui buatsaih a nih bawk avangin lawmawm a tih thu a sawi.
“Mipui mimir, la naupang tak tak pawhin IT hi hnathawhna atan bakah kohhran leh khawtlang rawngbawlna atan pawh kan mamawh tawh avangin helama thanharh zel a pawimawh a. Chutihrualin mobile phone changkang hum theih leh a chhuak thar tha hriatah inel loin, inelna tha leh dikah inel zawk turin thalaite ka chah a ni,” a ti.
Sawrkarin mahnia dingchhuak thei turin entrepreneurship lam a ngaipawimawh tih LESDE secretary hian a sawi a. Tuna sawrkar pawhin Bana Kaih policy ruahmanin, heng atang hian project siamin a diltheih tih a sawi. Hetiang lama ngaihtuahna seng a, midang hnena hna dil mai loa, midang chhawrtu ni thei zawk turin a fuih a ni.
NIELIT Aizawl director Dr T Gunendra Singh sawi danin, kum reiloteah central university puitling an nih thuai a beisei a. North East-ah NIELIT Centre 20 vel a awm mek a, India ram pumah Centre 50 vel a awm. NIELIT Aizawl bik hian Extension Centre Lunglei-ah a nei a, district hrang hrangah Exam Centre engemawzat an nei bawk.
Aizawlah NIELIT Job Fair
